АНУ нэгэн цагт гадаад оюутнуудын хамгийн их сонирхдог улс байсан бол сүүлийн жилүүдэд энэ байр сууриа алдаж эхэлжээ. Цагаачлалын хатуу бодлого, визийн шаардлага чангарах болсон нь АНУ-ын нэр хүндтэй сургуулиудад элсэгчдийн тоог эрс бууруулсан байна. Үүний улмаас тус улс ойролцоогоор 7 тэрбум долларын эдийн засгийн алдагдал хүлээх эрсдэлтэй байгаа бол оюутнууд Их Британи болон Азийн шинэ төвүүдийг сонгох хандлага эрс нэмэгджээ.
Их Британи олон улсын бакалаврын түвшний элсэлтийг 2.2 хувиар өсгөсөн бол Азид Малайз, Хонгконг, Сингапур зэрэг улсууд гадаад оюутны шинэ чиглэл болж байна. Тухайлбал, Хонгконгийн Шинжлэх ухаан, технологийн их сургуулийн элсэлт 40 хувиар нэмэгджээ. Дубайд салбар кампусууд өргөжин хөгжиж, бүс нутгийн боловсролын төв болон төлөвшиж буй нь ч оюутнуудын сонирхлыг татаж байна.
Түүнчлэн Арабын Нэгдсэн Эмират улсад гадаад оюутны тоо 2024-2025 онд 33 хувиар өссөн нь боловсролын шинэ төв болон төлөвших чиг хандлагыг бататгаж байна. Үүнтэй зэрэгцэн Illinois Tech, Arizona зэрэг АНУ-ын их сургуулиуд Казахстан улсад салбараа байгуулж, Төв Азийг олон улсын боловсролын зангилаа болгох алхмууд хийж эхэлжээ.
Эх сурвалж: ГИХГ
