Увс аймгийн түүхт 100 жилийн ойн хүрээнд “Уул, усны диваажин” нэртэй монгол уран зургийг бүтээж, нутгийн зон олондоо зориулан бэлэг барьжээ. Энэхүү бүтээл нь Дархан дахь нутгийн зөвлөлийн санаачилгаар хэрэгжиж, аймгийн Зураач, Урчуудын эвлэлийн хамт олон бүтэн гурван сарын турш гар нийлүүлэн туурвисан байна.
Уран зурагт Увс нутгийн онцлог болох шүтээн хайрхан уулс, тунгалаг нуур гол мөрөн, тал хөндийн байгаль, ан амьтан, аж амьдрал гээд нутгийн бүх өнгө төрхийг багтаан дүрсэлжээ. Зургийн хэмжээ 5 метрийн урттай, 1.5 метрийн өндөртэй бөгөөд ерөнхий зураачаар Соёлын тэргүүний ажилтан Нямаагийн Хишигбаатар, ахлах зураачаар Соронзонболдын Мөнгөнзул, зураачаар Буяннэмэхийн Нэмэхням, Төмөрхуягийн Булгандэлгэр, Нордогийн Энхзаяа нар ажилласан байна.
Бүтээл төрөх агшныг Соёлын гавьяат зүтгэлтэн, сэтгүүлч, зураач Ө.Рагчаасүрэн нүдээрээ харж, сэтгэл хөдөлсөн сэтгэгдлээ илэрхийлсэн бөгөөд зурагт Увс нутгийн алдартнуудыг ч танигдахаар тод дүрсэлсэн байгааг онцолж, бүтээлч хамт олонд гүн талархал илэрхийлсэн байна.
Уран зургийг аймгийн баяр наадмын нээлтийн үеэр нутгийн удирдлагад гардуулан бэлэглэсэн бөгөөд Цахиур.мн сайт уг агшныг гэрэл зургийн хальснаа буулгажээ. Түүнчлэн уг бүтээлийг аймгийн ойн номд оруулж хэвлэх, багасгасан хувилбарыг ил захидал, марк, бэлэг дурсгалын зүйл болгон түгээх ажлыг төлөвлөж буйг ерөнхий зураач Н.Хишигбаатар онцлон мэдэгдсэн байна.
