Монгол хүний мөн чанар, өв соёл, уламжлал, зан заншлыг хүүхэд залуучуудад таниулах, эх оронч үзэл төлөвшүүлэх зорилго бүхий “Хүүхэд залуучуудад эх оронч үзэл төлөвшүүлэх үндэсний хөтөлбөр”-ийг Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлөөс санаачлан хэрэгжүүлж байна. Энэ хүрээнд ерөнхий боловсролын сургуулийн 9-10 дугаар ангийн сурагчдад зориулсан “Эх оронч сурагч” хөтөлбөрийг амжилттай хэрэгжүүлж, 7 дүүргээс нийт 46 сурагчийг хамруулжээ.

Хөтөлбөр “Хөдөлмөр” зусланд 7 хоногийн турш зохион байгуулагдаж байгаа бөгөөд сурагчид эх оронч үзэл, үндэсний бахархал, нүүдэлчдийн ёс заншил, түүх соёлоо танин мэдэх олон төрлийн сургалт, тоглоомоор дамжуулан мэдлэгээ баяжуулж байна. Хөтөлбөрийн гурав дахь өдөр НИТХ-ын дарга А.Баяр, төлөөлөгчид Д.Отгонсүрэн, Д.Наянбаяр нар сурагчидтай уулзаж, хөтөлбөрийн үйл ажиллагаатай танилцан, хүүхдүүдтэй нэг өдрийг хамтдаа өнгөрүүллээ.

НИТХ-ын дарга А.Баяр эх оронч сэтгэл, зөв хүн болж төлөвшихийн ач холбогдол, ном уншихын үнэ цэнэ зэрэг сэдвээр илтгэл тавьж, сурагчдын асуултад хариулсан бол Д.Отгонсүрэн хөтөлбөрийн ач холбогдлыг онцлон, монгол хүний онцлог, дархлааны тухай хуваалцсан байна. Мөн төлөөлөгч Д.Наянбаяр байгаль эхтэй харьцах хандлага, эх орноо илүү сайн таних талаар сурагчидтай ярилцжээ.

Энэ өдөр сурагчдын ар гэрийнхэн зусланд очиж эргэлт хийсэн бөгөөд хүүхдүүд өглөө бүр төрийн дууллаа дуулах, далбаагаа мандуулах, жагсаалын бэлтгэл хийх, багаар ажиллах чадвараа хөгжүүлэх зэрэг олон сонирхолтой үйл ажиллагаанд хамрагдаж буйгаа дуулгасан байна. Эцэг эхчүүдийн зүгээс хүүхдүүд эрүүл хооллож, цахим хэрэглээнээс хол байж, сахилга бат, хариуцлага, бие даасан байдлыг сурч байгаад сэтгэл хангалуун байгаагаа илэрхийлжээ.

Эх сурвалж: НИТХ