2025 оны Элсэлтийн ерөнхий шалгалт (ЭЕШ) нь өнөөдрөөс буюу зургаадугаар сарын 18-ны өдрөөс улс орон даяар эхэлж байна. Боловсролын үнэлгээний төвөөс ЭЕШ-ын зохион байгуулалт, онцлог болон холбогдох бусад мэдээллийг олон нийтэд танилцууллаа.

Шалгуулагчдын бүртгэл болон хуваарилалт: Энэ онд ЭЕШ-д нийт 43,318 шалгуулагч бүртгүүлснээс 3,000 нь өмнөх оны төгсөгчид байна. Харин энэ онд 12 дугаар анги төгсөж буй 42,961 шалгуулагч байгаагаас хөдөө орон нутагт 21,362, нийслэлд 21,599 шалгуулагч шалгалт өгөхөөр байна.

2025 оны ЭЕШ-ын онцлог: Энэ жилийн ЭЕШ-ын гол онцлог нь математикийн хичээлийн даалгаврыг анх удаа нээлттэйгээр танилцуулсан явдал юм. Энэ нь шалгалтын ил тод байдлыг нэмэгдүүлж, шалгуулагчдад бэлтгэх боломжийг олгож байна. Мөн олон улсад хүлээн зөвшөөрөгддөг элсэлтийн шалгалтын дүн оноог дүйцүүлэх боломжийг бүрдүүлж байгаа нь чухал ач холбогдолтой.

Монгол хэл бичгийн шалгалт (МХБШ): Монгол хэл бичгийн шалгалтыг дөрөвдүгээр сарын 5-ны өдөр зохион байгуулсан. Шалгуулагч нь уг шалгалтад 400-аас дээш оноо авсан тохиолдолд их, дээд сургуульд элсэн орох эрх нь үүснэ. Элсэлтийн шалгалтыг жилд хоёр удаа зохион байгуулдаг тогтолцоог нэвтрүүлээд дөрвөн жил болж байгаа бөгөөд энэ оны хоёр дахь шалгалтыг 12 дугаар сард дахин зохион байгуулах юм. ЭЕШ-ыг зохион байгуулах комисст нийт 2966 хүн оролцож байна.

Дүн оноо мэдээлэх, баталгаажуулах журам: Шалгалтын дүн оноо, засалтын үйл ажиллагааг шууд засалтын шилэн технологи ашиглан гүйцэтгэнэ. Шалгалт бүрийн дараа шалгалтын байрны тусгайлан зассан байранд шалгуулагчийн анхны оноог мэдээлж, шалгалтын хэмжээст оноог тухайн шалгалтыг зохион байгуулснаас хойш 24 цагийн дотор www.eec.mn цахим хаягийн “шалгуулагчийн булан”-д байршуулах аж.

Элсэлтийн шалгалтын дүн онооны нэгдсэн жагсаалтыг бүх шалгалтыг зохион байгуулснаас хойш 24 цагийн дотор www.eec.mn цахим хуудсанд байршуулна. МХБШ-ын дүн оноог шалгалт зохион байгуулснаас хойш 10 хоногийн дотор www.eec.mn цахим хуудсанд байршуулах юм.

Мөн зургаадугаар сарын 28-наас эхлэн МХБШ болон ЭЕШ-ын дүн оноо бүхий батламж хуудсыг www.eec.mn болон e-mongolia.mn цахим үйлчилгээний нэгдсэн порталд байршуулснаар шалгуулагч хэвлэж авах боломжтой болно. Энэхүү батламж хуудас нь шалгалт өгснөөс хойш 2.8 жил буюу 33 сарын хугацаанд хүчин төгөлдөр байх талаарх мэдээллийг өнөөдрийн хэвлэлийн хурлаар хүргэлээ.

Шалгалтын хуваарь:

• Зургаадугаар сарын 18:

  • Түүх: 10:00-11:20
  • Англи хэл: 14:00-15:20

• Зургаадугаар сарын 19:

  • Хими: 10:00-11:40
  • Газар зүй: 13:00-14:20
  • Нийгэм судлал: 16:30-17:50

• Зургаадугаар сарын 20:

  • Биологи: 10:00-11:20
  • Математик: 14:00-15:20

• Зургаадугаар сарын 21:

  • Физик: 10:00-11:40
  • Орос хэл: 13:00-14:20
  • Монгол хэл: 16:00-17:20