Сүүлийн 10 жилийн хугацаанд буюу 2014-2024 оны хооронд ерөнхий боловсролын сургуулийн хичээлийн жилийн бүтцэд нийт 12 удаа өөрчлөлт оржээ. Энэ хугацаанд 4 жилд нь 3 улирлын хуваарь, үлдсэн 6 жилд нь 4 улирлын бүтэц хэрэгжиж байв. Бүтцийн давтамжтай өөрчлөлт нь сургууль, эцэг эх, сурагчдын хувьд тодорхой бус байдал үүсгэж, төлөвлөлтөд хүндрэл учруулсаар ирсэн байна.
Түүнчлэн, өнгөрсөн 10 жилийн дотор нийт 6 удаа хичээлийн жилийн явцад буюу хичээл явагдаж байх үед өөрчлөлт хийж байжээ. Үүний шалтгаанд:
-
Өвлийн хүйтний эрч нэмэгдэх
-
Агаарын бохирдлын өндөр түвшин
-
Ханиад, томуу, цар тахлын дэгдэлт
-
Олон нийтийн зүгээс ирүүлсэн санал, шаардлага
зэрэг нийгмийн болон байгаль цаг уурын хүчин зүйлс голлон нөлөөлсөн байна. Үүний улмаас сургуулиуд танхимын хичээлээс цахим хичээлд гэнэт шилжих, улирлын амралтын хуваарьт өөрчлөлт орох зэргээр сурагчдын хичээл сургалтын хэв маяг тасралтгүй доголдож байв.
Харин 2024-2025 оны хичээлийн жил батлагдсан хуваарийн дагуу ямар нэгэн тасалдалгүй танхимын сургалтаар бүрэн хэрэгжиж, өнгөрсөн долоо хоногт албан ёсоор дууссан байна. Энэ нь сүүлийн арван жилд анх удаа тогтвортой, гэнэтийн өөрчлөлтгүйгээр дууссан хичээлийн жил болсныг салбарынхан онцолж байна.
Эх сурвалж: Боловсрол, шинжлэх ухааны яам
