ОБЕГ-ын дэргэдэх Гамшгаас хамгаалах сургалтын төв–116 дугаар анги, НҮБ-ын Хүүхдийн сан, Монголын Хүүхдийн зөвлөлтэй хамтран “Үе тэнгийн сургагч багш бэлтгэх” сургалтыг зургаадугаар сарын 16-17-нд зохион байгуулж байна. Энэхүү сургалтад 21 аймаг, нийслэлийн 9 дүүргийн нийт 40 гаруй сурагч оролцож, гамшгийн эрсдэлийг танин мэдэх, түүнд дасан зохицох мэдлэг, чадвараа нэмэгдүүлж, цаашид үе тэнгийнхэндээ зааж сургах бэлтгэл хангаж байна.

Сургалтын нээлтэд ОБЕГ-ын дэд дарга, хурандаа Ц.Уранчимэг оролцож хэлэхдээ, уур амьсгалын өөрчлөлт, дэлхийн дулаарал, гамшигт үзэгдэл улам ихсэж байгаа өнөө үед хүүхдийн эрх, сурч боловсрох боломж, аюулгүй орчинд амьдрах нөхцөлд ноцтой нөлөөлж байгааг онцлон тэмдэглэв. Тэрээр “2024 онд дэлхий даяар 242 сая хүүхэд уур амьсгалын гамшгийн улмаас хичээл тасалж, боловсрол эзэмших эрхээ бүрэн эдэлж чадаагүй. Харин сүүлийн 6 жилийн хугацаанд 43.1 сая хүүхэд зөвхөн цаг агаарын гамшгаас үүдэн гэр орноо орхин нүүхэд хүрсэн бол манай улсад 2023-2024 оны зуднаар 80 мянга гаруй малчин өрхийн хүүхдүүд хичээл завсардсан тухай судалгаа бий” хэмээн дурдлаа.

Сургалтын хүрээнд сурагчид аюулгүй өрхийг бүрдүүлэх, утаат орчноос гарах арга, гал түймэр унтраах техник, эмнэлгийн анхан шатны тусламж үзүүлэх, газар хөдлөлтийн үед аюулгүй байдлаа хангах, өндрөөс хүний амь аврах ажиллагаа зэрэг олон чухал сэдвийн хүрээнд мэдлэг, дадлага эзэмшинэ. Энэ бүхэн нь хүүхдүүд зөвхөн өөрийгөө хамгаалаад зогсохгүй, бусдад ч туслах чадвартай, гамшгаас хамгаалах мэдлэгтэй иргэд болон төлөвшихөд чиглэгдэж байна.

Сургалт нь хүүхдийн эрхийг хамгаалах, гамшгийн эрсдэлийг бууруулах үйлсэд тэдний оролцоог нэмэгдүүлэх, ур чадварыг хөгжүүлэхэд чухал алхам болж байгаа юм.

Эх сурвалж: ОБЕГ.