2025 оны Элсэлтийн ерөнхий шалгалтын суудлын хуваарь гарсан бөгөөд шалгуулагчид https://eyesh.eec.mn/profile/login цахим хаягаар нэвтэрч, “Шалгуулагчийн булан” хэсгээс бүртгэлийн дугаар болон нууц үгээ ашиглан хуваариа хэвлэж авах шаардлагатай гэж Боловсролын үнэлгээний төвөөс мэдээллээ.

Суудлын хуваарь нь шалгуулагч шалгалтад ороход заавал авч очих бичиг баримтын нэг тул урьдчилан хэвлэн бэлтгэхийг анхааруулж байна. Элсэлтийн шалгалт ирэх долоо хоногийн Лхагва гарагт, буюу зургаадугаар сарын 18-нд түүхийн хичээлээр эхэлнэ.

Шалгалтад авч очих баримт бичгүүд:

1. Бүртгэлийн хуудас
   – 2025 онд ЕБС төгсөж буй шалгуулагчид сургууль дээрээ захирлын гарын үсэг, тамга даруулж баталгаажуулсан байх
   – 2025 оноос өмнө төгссөн шалгуулагчдын бүртгэлийн хуудас QR кодтой байх шаардлагатай

2. Суудлын хуваарь

3. Боловсролын баримт бичиг
   – Бүрэн дунд болон түүнээс дээш боловсрол эзэмшсэнийг нотлох бичиг баримт

4. Иргэний үнэмлэх
   – Иргэний үнэмлэх байхгүй тохиолдолд E-Mongolia лавлагаа, жолооны үнэмлэх, эсвэл гадаад паспорт зэргийг орлуулж болно

Шалгалтад бүрэн бэлтгэлтэй оролцохын тулд бичиг баримтаа урьдчилан нягталж, хэвлэж, бүрдүүлэхийг БҮТ-өөс зөвлөж байна.

Эх сурвалж: Боловсролын үнэлгээний төв (БҮТ)