Монголын хөгжмийн урлагийн алдартай таван хамтлаг болох “Дижитал”, “Quiza”, “Гурван охин”, “Татар”, “MC Collection” хамтран энэ зуны хамгийн том, тэсрэлттэй задгай шоу болох “One stage” тоглолтыг зургаадугаар сарын 14-нд Social park-д зохион байгуулах гэж байна.
Тоглолтын онцлог нь зочин уран бүтээлчгүй, зөвхөн таван хамтлагийн 60 гаруй хит дууг амьд хөгжимтэйгээр хүргэхэд оршиж байгаа бөгөөд үзэгчдэд цэвэр уран бүтээлчдийн эрч хүч, тайзны гайхалтай найруулгыг мэдрүүлэх зорилготой юм.
Тус тоглолтод зориулан “Татар”, “Quiza” хамтран “Шаргын говиор ганцаараа…”, “One stage” нэртэй шинэ уран бүтээлээ гаргасан бол “Дижитал” болон “Гурван охин” хамтлагууд ч мөн шинэ уран бүтээлээ анх удаа тайзнаа толилуулах аж. Тоглолтын найруулагчаар “On’n off” продакшны ерөнхий захирал, МУУГЗ С.Ононбат ажиллаж байгаа бол мэргэжлийн "Live stream" баг, амьд хөгжмийн бүрэлдэхүүн хамтран ажиллаж, техник, дуугаралт, гэрлийн шийдэлд онцгой ач холбогдол өгч байгаа аж.
Өвөрмөц концепц, хүчирхэг тайз, чанартай амьд хөгжим хосолсон “One stage” тоглолт нь энэ зун дурсамж үлдээх онцлох хөгжмийн арга хэмжээ болж буйг зохион байгуулагчид онцолж байна.
