“Даншиг наадам-Хүрээ цам 2025” шашин соёлын наадам энэ оны зургаадугаар сарын 27-29-нд Хүй долоон худагт зохион байгуулагдана. Энэхүү наадмыг Нийслэлийн Засаг даргын Тамгын газар, Аялал жуулчлалын газар, Монголын бурхан шашинтны төв Гандантэгчэнлин хийдтэй хамтран зохион байгуулж байгаа бөгөөд энэ жил нийслэл хотын иргэдэд зориулсан баяр болгон анх удаа тэмдэглэж байгаагаараа онцлог юм.

Наадам Улаанбаатар хотын тахилга шүтлэгт дөрвөн уул болох Богдхан, Сонгинохайрхан, Чингэлтэй, Баянзүрх хайрханыг тахих ёслолоор эхэлнэ. Нийслэлийн сүм хийдүүдийн цан хэнгэргийн эгшиг дор ард иргэдийн сайн сайхны төлөө хурал ном уншиж, буян үйлдэх ажлууд өрнөнө. Түүнчлэн лам нарын ном хаялцах, балин тосон урлалын уралдаан зэрэг уламжлалт арга хэмжээ зохион байгуулагдана.

Даншиг наадмын хөтөлбөрт:

• Цамын их ёслол, Очирвааны тахилга, Сүнчэ айлдвар, Чингис хааны сан заллага, соёмбот туг залах, шашны сүлд дуулал эгшиглүүлэх зэрэг шашин соёлын зан үйл,

• Хүчит бөхийн барилдаан, хурдан болон жороо морьдын уралдаан, сур, шагайн харваа, сээр цохих зэрэг үндэсний спортын төрөл,

• Жижиг дунд бизнес эрхлэгчдийн үзэсгэлэн, Улаанбаатар хотын гэрэл зургийн түүхэн үзэсгэлэн, үндэсний хувцасны загварын үзүүлбэр,

• Есөн дүүргийн Ардын авьяастнуудын тоглолт болон “Монгол туургатан” уран бүтээлүүд багтжээ.

Даншиг наадам нь анх 1639 онд Өндөр гэгээн Занабазарыг анхдугаар Богд Жавзандамба хутагтаар өргөмжлөх үеэс үүсэлтэй. Тэр цагаас хойш энэ наадам Монголын бурхны шашны хамгийн том баяр болон хөгжсөн бөгөөд цам нь тус наадмын гол онцлог юм. Цамын бүжиг нь бясалгалын гүн утгыг илэрхийлж, муу муухайг дарж буй үйл хөдлөл, гоёл чимэг, хувиргалтаараа жуулчдын анхаарлыг татдаг.

Энэ удаагийн Даншиг наадам Улаанбаатарын иргэд болон олон улсын жуулчдад Монголын уламжлалт шашин, соёлыг мэдрүүлж, аялал жуулчлалыг хөгжүүлэх чухал алхам байх болно.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс