Сэлэнгэ аймгийн Зүүнбүрэн сумын Ерөнхий боловсролын сургуулийн 10а ангийн сурагч П.Бэрцэцэг “Код бичих охидын хөтөлбөр”-т амжилттай тэнцжээ. Энэхүү хөтөлбөр нь НҮБ-ын Хүүхдийн сангийн санхүүжилтээр хэрэгжиж буй бөгөөд технологийн салбар дахь хүйсийн тэгш бус байдлыг бууруулах зорилготой юм.

Хөтөлбөр нь охидод шинжлэх ухаан, технологи, инженерчлэл, математик (СТЕМ) чиглэлээр ур чадвар олгохын зэрэгцээ практик орчинд код бичих, англи хэлээ сайжруулах, салбарын манлайлагчдаас туршлага судлах зэрэг олон боломжийг олгодог. П.Бэрцэцэгийн суралцах замыг англи хэлний багш Э.Оюумаа чиглүүлэн дэмжжээ.

2025 оны гуравдугаар сарын 31-нээс дөрөвдүгээр сарын 20-ны хооронд бүртгэл нь явагдсан тус хөтөлбөрийн нэг онцлог нь Монгол орны алслагдсан бүс нутгийн охидыг хамруулахыг зорьдогт оршино. Үүний үр дүнд хөтөлбөр эхэлсэн цагаасаа хойш нийт 110 орчим охинд мэдээллийн технологийн боловсрол олгож, тэднийг дотоод, гадаадын нэр хүндтэй их сургуулиудад тэтгэлгээр суралцах, олон улсын тэмцээнд оролцох боломжтой болгож чаджээ.

ЮНЕСКО-гийн сүүлийн үеийн тайланд дэлхий дахинд технологийн салбарт эмэгтэйчүүдийн эзлэх хувь ердөө 26 хувьтай байгааг онцолсон бол Монгол Улсад энэ үзүүлэлт бүр бага буюу 20 хувьтай байна. Иймд “Код бичих охидын хөтөлбөр” нь мэдээлэл, харилцаа холбоо, технологийн салбар дахь жендэрийн тэгш бус байдлыг бууруулах, цахим хуваагдлыг арилгах зорилготой Монголын анхны ашгийн бус санаачилга юм.

Энэхүү хөтөлбөр нь зүгээр нэг программ хангамжийн сургалт бус, харин ирээдүйн дижитал эрин үеийг бүтээлчээр авч явах, нийгмийн өөрчлөлтийн манлайлагчдыг бэлтгэх чухал хөшүүрэг хэмээн үнэлэгдэж байна.

Эх сурвалж: НҮБ-ын Хүүхдийн сан, Girls Code Mongolia