Парис хотноо болсон Дэлхийн мал амьтны эрүүл мэндийн байгууллагын (WOAH) 92 дахь Ерөнхий чуулганы хуралдааны үеэр Монгол Улсын шүлхий өвчинтэй тэмцэх албан ёсны хяналтын үндэсний хөтөлбөрийг батламжилж, гэрчилгээ гардууллаа. Энэхүү үйл явдал нь манай улсын хувьд олон улсын тавцанд өвчний хяналтын арга хэмжээнийхээ үр дүн, стандартын нийцлийг албан ёсоор хүлээн зөвшөөрүүлсэн томоохон алхам боллоо.

WOAH-оос энэхүү хөтөлбөрийг баталгаажуулсан нь шүлхий өвчнийг илрүүлэх, урьдчилан сэргийлэх, хяналт тавих, богино хугацаанд хариу арга хэмжээ авах зэрэг бүхий л шатны ажлуудыг Монгол Улс олон улсын шаардлагад нийцүүлэн зохион байгуулж байгааг илэрхийлж байна.

Хөтөлбөр батлагдсанаар дараах боломжууд бий болж байна:

• Мал, амьтны гаралтай түүхий эд, бүтээгдэхүүний бүс нутгийн болон олон улсын худалдаанд нэвтрэх боломж нэмэгдэнэ

• Хөдөө аж ахуйн гаралтай экспортын чадавх дээшилнэ

• Зах зээлд өрсөлдөх чадвар өснө

Монгол Улс цаашид энэхүү хөтөлбөрийн хэрэгжилтийг жил бүр WOAH-д тайлагнаж, шат дараатайгаар шүлхий өвчнөөс ангид, тайван бүс нутаг, улмаар өвчингүй орон болох зорилго тавин ажиллаж буйг холбогдох байгууллагууд онцолжээ.

Эх сурвалж: WOAH, Хөдөө аж ахуйн яам