Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ойг тэмдэглэх Үндэсний их баяр наадмын бэлтгэл ажил эрчимтэй үргэлжилж байна. Энэхүү хүрээнд Урлаг, соёлын арга хэмжээний салбар хороо болон нээлтийн ажиллагааг хариуцсан багийн ээлжит хурал өнөөдөр Төв цэнгэлдэх хүрээлэнд боллоо.
Хурлыг наадмын салбар хорооны нарийн бичгийн дарга удирдан явуулсан бөгөөд энэ жилийн баярын үеэр зохион байгуулагдах урлаг, соёлын арга хэмжээний зохион байгуулалт, бэлтгэл ажлын явц, холбогдох төлөвлөгөөний хэрэгжилтийн талаар дэлгэрэнгүй хэлэлцэж, цаашдын үйл ажиллагааны уялдаа холбоог хангах чиглэлээр санал солилцсон байна.
Соёл, урлагийн газрын мэдээлснээр, урлаг, соёлын арга хэмжээнүүд нь салбар хорооны баталсан төлөвлөгөөний дагуу шат дараатайгаар хэрэгжиж байгаа бөгөөд нээлтийн үйл ажиллагаа, тоглолт, үзүүлбэрүүдийг чанартай, өв соёлын онцлогийг хадгалсан байдлаар бэлтгэхэд онцгой анхаарч байгаа аж.
Түүнчлэн орон даяар өрнөх баярын уур амьсгалыг бүрдүүлэх, үндэсний язгуур уламжлалыг илэрхийлэх арга хэмжээ, орчин цагийн урлагийг хослуулсан шинэ шийдэл бүхий тоглолтуудыг үзэгчдэд хүргэхээр зорьж буйг хуралд оролцогчид онцлон тэмдэглэлээ.
