Архангай аймгийн Политехникийн коллеж 52 дахь хичээлийн жилийн төгсөлтийн баяраа өнөөдөр тэмдэглэж, техникийн болон мэргэжлийн боловсрол эзэмшсэн төгсөгчдөдөө диплом гардууллаа. 2024-2025 оны хичээлийн жилд нийт 1309 суралцагчтайгаар үйл ажиллагаагаа явуулсан тус сургууль энэ удаад 304 төгсөгчийг хөдөлмөрийн зах зээлд бэлтгэн гаргаж байна.

Тухайлбал, мэргэжлийн боловсролын нэг жилийн сургалтаар 10 мэргэжлээр 251 суралцагч, техникийн боловсрол олгох 1.5 жилийн сургалтаар гурван мэргэжлээр 53 суралцагч төгсөж байгаа юм. Эдгээр мэргэжлүүд нь орон нутгийн хөдөлмөрийн зах зээлийн эрэлт хэрэгцээнд нийцсэн, үйлдвэрлэлд шууд гарах чадвартай ажилтан бэлтгэх зорилготой аж.

Анх 1974 онд "Усны аж ахуйн техник мэргэжлийн сургууль" нэртэйгээр байгуулагдаж байсан энэхүү коллеж нь өнөөдрийг хүртэл нийтдээ 23,000 гаруй мэргэжилтэй ажилтныг бэлтгэж, Архангай аймаг болон бусад бүс нутгийг мэргэжлийн боловсон хүчнээр тогтвортой хангаж иржээ.

Мөн төгсөгчдөө ажлын байраар хангах зорилгоор 166 аж ахуйн нэгж, байгууллагуудтай хамтран ажиллаж, хөдөлмөр эрхлэлтийн түвшинг 81.6 хувьд хүргээд байна. Үүнээс гадна олон улсын хөдөлмөрийн зах зээлд гарах боломжийг ч мөн олгож байгаа бөгөөд Япон улсад дадлагажигч ажилтан илгээх хөтөлбөрийг хэрэгжүүлж, 10 гаруй оюутан Токио болон бусад хотод ажиллаж, мэргэжлээ дээшлүүлэн амьдарч байна. Маргааш ч мөн гурван суралцагч хилийн дээс алхахаар бэлтгэлээ хангаад байна.

Эдгээр үзүүлэлтүүд нь тус коллежийн сургалтын чанар, төгсөгчдийн эрэлт хэрэгцээ, олон улсад гарах боломжийг илтгэх бодит жишээ болж байна.

Эх сурвалж: Архангай аймгийн ЗДТГ