Улсын дуурь, бүжгийн эрдмийн театр энэ амралтын өдрүүдэд буюу зургаадугаар сарын 7, 8-нд Жакомо Пуччинийн алдарт “Чио Чио Сан” буюу “Эрвээхэй хатан” дуурийг үзэгчдийн хүртээл болгох гэж байна.

Энэ удаагийн тоглолтын онцлог нь Монгол, Солонгосын уран бүтээлчид хамтран тайзнаа амилуулж буй явдал юм. Тухайлбал:

• Зургаадугаар сарын 7-ны тоглолтод Солонгосын уран бүтээлчид гол дүрүүдийг бүтээнэ.

• Зургаадугаар сарын 8-нд Чио Чио Саны дүрийг Г.Энхнаран, Сүзүкигийн дүрийг Ж.Энхмаа тус тус бүтээхээр төлөвлөжээ.

Ж.Пуччини уг дууриа анх 1904 онд Миланы “Ла Скала” театрт хоёр үзэгдэлтэйгээр тоглуулсан ч таагүй хүлээсэн авч, дараа нь засварлан гурван үзэгдэлтэй болгож 1907 онд Парист эцсийн хувилбарыг тоглуулснаар өнөөгийн хэлбэрээ олсон түүхтэй. Уг бүтээл нь өнөөдөр дэлхий даяар тоглогддог дуурийн жагсаалтад зургаадугаарт бичигддэг юм.

Монголын тайзнаа “Чио Чио Сан” дуурийг анх 1967 оны дөрөвдүгээр сарын 17-нд найруулагч Д.Лхасүрэн, удирдаач Б.Дамдинсүрэн, Ж.Чулуун нарын удирдлага дор тавьж байсан бөгөөд монголын дуурийн урлагийн түүхэнд гүн ул мөр үлдээсэн билээ.

Дуурь нь япон эмэгтэй Чио Чио Сан болон Америкийн тэнгисийн цэргийн офицер Пинкертон нарын бодит амьдралаас сэдэвлэсэн гунигт хайрын түүхээр дамжуулан азийн эмэгтэйчүүдийн үнэнч сэтгэл, хатан зориг, барууны соёлын нөлөө, колоничлолын шүүмжлэлийг харуулдгаараа утга агуулга өргөнтэй бүтээл юм.

Пуччини энэхүү дууриа туурвихдаа Япон улсын ардын дуу, хөгжмийн зэмсэг, соёл заншлыг гүнзгий судалж, түүний хөгжмийн уур амьсгалыг европ дуурийн хэлбэрт уусгаж, барууны болон дорнын өнгө аясын огтлолцол бүхий өвөрмөц бүтээл туурвисан нь “Чио Чио Сан”-ыг дэлхийн сонгодог урлагийн сор болсон шалтгаануудын нэг юм.

Эх сурвалж: Улсын дуурь, бүжгийн эрдмийн театр