Монгол Улс, БНХАУ-ын хоорондын хоёр дахь төмөр замын холболт болох Гашуунсухайт-Ганцмод боомтын хил холболтын төмөр замын бүтээн байгуулалтын нээлт тавдугаар сарын 14-нд болж, нээлтийн ёслолд Монгол Улсын Ерөнхий сайд Л.Оюун-Эрдэнэ оролцож үг хэллээ.

Тэрбээр 1955 оны Замын-Үүд-Эрээн чиглэлийн төмөр замын холболтын дараа анх удаа хоёр улс төмөр замаар холбогдож байгааг онцоллоо. Энэхүү хэлэлцээр 2004 оноос хойш 20 орчим жил яригдаж, олон улсын зах зээл, дотоодын эрх ашиг, гуравдагч этгээдийн оролцоотой маргааны улмаас удааширч ирсэн ч 2024 оны хоёрдугаар сард Засгийн газар хоорондын хэлэлцээрт гарын үсэг зурж, гурван сарын дотор бүтээн байгуулалтыг эхлүүлж байгааг тэмдэглэв.

Гашуунсухайт боомтын шинэчлэл, өргөтгөлөөр экспорт, импортын 22 гарц нээгдэж, боомтын нэвтрүүлэх чадвар хоёр дахин нэмэгдэнэ. Ингэснээр жилийн экспорт 165 сая тонн хүрч, ДНБ-д 1.5 тэрбум ам.долларын орлого нэмэгдэн, нэг хүнд ногдох ДНБ 10 мянган ам.долларт хүрэх суурь нөхцөл бүрдэнэ гэж Ерөнхий сайд онцоллоо.

Төслийн ач холбогдлыг “улс төр, эдийн засгийн гуравдагч талын оролцоогүйгээр, зөвхөн хоёр орны Засгийн газрын түвшинд шийдвэрлэсэн” гэж тодорхойлсон нь олон жил гацсан уг төслийн онцлогт тооцогдож байна.

Нээлтийн үеэр Ерөнхий сайд БНХАУ-ын удирдлага, элчин сайд, холбогдох яамд, хамтран ажилласан бүх талуудад талархал илэрхийлээд, уг төмөр замаас гадна Шивээхүрэн-Сэхэ, Ханги-Мандал, Бичигт-Зүүнхатавч зэрэг боомтыг төмөр замаар холбох дараагийн төслүүд хэрэгжих бэлтгэл хангагдсаныг дуулгав. Мөн “Алсын хараа-2050” бодлогын хүрээнд Монгол Улс сэргээгдэх эрчим хүч, гүн боловсруулалт, технологийн салбарт хөрш орнуудтай харилцан ашигтай хамтран ажиллахад бэлэн гэдгээ илэрхийллээ.

Энэхүү төсөл нь Засгийн газрын 14 мега төслийн нэгдүгээрт эрэмбэлэгдсэн бөгөөд ОХУ, БНХАУ-тай хамтран байгалийн хийн хоолой, төмөр замын гурван талт төслүүдийг хэрэгжүүлэхийн төлөө Монгол Улс цаашид ч идэвхтэй байр суурь баримтлахаа Ерөнхий сайд мэдэгдэв.

Эх сурвалж: TASS, Засгийн газрын ХМХ