Боловсролын үнэлгээний төвөөс өнөөдөр Монгол хэл бичгийн шалгалтын дүн оноог олон нийтэд албан ёсоор зарлалаа. 2025 оны Монгол хэл бичгийн шалгалтад нийт 83,374 шалгуулагч хамрагдсан нь өмнөх жилээс эрс нэмэгдсэн үзүүлэлт боллоо. 2024 оны хаврын шалгалтад ердөө 33,361 сурагч оролцож байсан юм.
Энэ жилийн онцлог нь зөвхөн 12 дугаар ангийн сурагчдаас гадна 10, 11 дүгээр ангийн сурагчид ч мөн уг шалгалтад хамрагдах боломжтой болсон явдал юм. Түүнчлэн монгол хэл бичгийн шалгалтын батламж хуудасны хүчинтэй хугацаанд өөрчлөлт оруулж, тэнцсэн тохиолдолд уг батламж насан туршид хүчинтэй байх шийдвэрийг БҮТ-өөс гаргасан байна.
Хэрэв шалгуулагч шалгалтын дүн оноотой санал нийлэхгүй бол тавдугаар сарын 9-13-ны өдрүүдэд Боловсролын үнэлгээний төвд хандан өргөдөл гаргаж, шалгалтын материалтай танилцах боломжтой юм.
Шалгалтын босго онооны болзол хангаагүй шалгуулагчид 12 дугаар сард дахин шалгалт өгөх боломжтой бөгөөд босго оноог хангаагүй ч Элсэлтийн ерөнхий шалгалт өгөх эрх нь нээлттэй хэвээр гэдгийг БҮТ-өөс онцлон мэдээллээ.
Эх сурвалж: Боловсролын үнэлгээний төв
