Грекийн Эгийн тэнгист орших Касос арлын ойролцоо тавдугаар сарын 14-ний шөнө 5.9 магнитудын хүчтэй газар хөдөлж, далайн эрэг орчмоос яаралтай нүүхийг оршин суугчдад анхааруулсан байна. Уг газар хөдлөлтийн төв нь Касосоос 48 км-ийн зайд, 83 км-ийн гүнд байгааг Германы геологийн судалгааны төв мэдээлжээ.
Газар хөдлөлт Израил, Туркийн баруун өмнөд хэсэг болон Египетийн зарим хотод мэдрэгдсэн ч одоогоор хүний амь нас эрсдсэн, эсвэл үлэмж хэмжээний хохирол учирсан тухай мэдээлэл бүртгэгдээгүй байна. Египетийн Одон орон, геофизикийн үндэсний хүрээлэн газар хөдлөлтийн хүчийг 6.4 магнитуд гэж тогтоожээ.
Цунамийн аюултай холбоотойгоор Грекийн Уур амьсгалын хямрал, иргэний хамгаалалтын яам “далайн эргээс холдож, өндөрлөг газарт гарахыг” оршин суугчдад уриалсан байна. Жуулчдын хөл тасардаггүй Санторини, Родос, Крит зэрэг арлуудын ойролцоох далайн бүсүүдэд чичирхийлэл мэдрэгдсэн тухай Афины их сургуулийн газар хөдлөлт судлалын лаборатори мэдээлсэн байна.
Грек улс нь хэд хэдэн тектоник хавтангийн зааг дээр оршдог учир газар хөдлөлтийн идэвхтэй бүсэд тооцогддог бөгөөд энэ мэт хүчтэй чичирхийлэл үе үе болдог гэдгийг мэргэжилтнүүд анхааруулж байна.
Эх сурвалж: AFP
