Москва хотноо тавдугаар сарын 9-нд болох Аугаа их Эх орны дайны ялалтын 80 жилийн ойн баярын арга хэмжээнд оролцохоор төлөвлөсөн Сербийн Ерөнхийлөгч Александр Вучичийн нисэх онгоцыг Латви, Литвийн эрх баригчид өөрсдийн агаарын орон зайгаар нэвтрүүлэхээс татгалзсан тухай Сербийн “Kurir” сонин мэдээлжээ. Латви улс энэхүү шийдвэрээ “нислэгийн зорилго нь улс төрийн хувьд эмзэг” гэж тайлбарласан бол Литва улс “техникийн болон дипломат эмзэг нөхцөл байдал” гэсэн үндэслэлээр татгалзсан байна.

Мөн Словакийн Ерөнхий сайд Роберт Фицогийн онгоцыг Польш, Литвийн агаарын орон зайгаар нисэхийг зөвшөөрөөгүй тухай мэдээлэл гарчээ. Гэсэн ч эдгээр орнуудын эрх баригчид албан ёсны тайлбар өгөөгүй байна. Сербийн Ерөнхийлөгчийн биеийн байдал тавдугаар сарын 3-нд муудсан тул АНУ-д хийх айлчлалаа зогсоон эмнэлэгт хүргэгдсэн бөгөөд Ялалтын баярт оролцох эсэх нь одоогоор тодорхойгүй байгаа юм.

ОХУ-ын нийслэлд болох энэхүү баярт Хятадын дарга Ши Жиньпин, Бразилын Ерөнхийлөгч Луис Инасиу Лула да Силва, мөн Казахстан, Беларусь, Куба, Венесуэл зэрэг орны удирдагчид оролцохоор төлөвлөж байна. Харин Энэтхэгийн Ерөнхий сайд Нарендра Моди оролцохоос татгалзжээ. Европын Холбооны зүгээс гишүүн орнууддаа Ялалтын баярт оролцохгүй байхыг зөвлөсөн бол Украины Ерөнхийлөгч Владимир Зеленский тус арга хэмжээнд оролцох нь Оросын түрэмгий үйлдлүүдийг дэмжсэн хэрэг болно хэмээн мэдэгдэж, бүх улс оронд хандан Москвад очихгүй байхыг уриалжээ.

Эх сурвалж: DW