2018-2025 онд Дорноговь аймгийн Сайншанд, Замын-Үүд сумын түр хамгаалах байраар нийт 190 хүүхдэд үйлчилгээ үзүүлжээ. Энэ нь тус бүс нутагт хүүхэд хамгааллын тогтолцоо тогтвортой үйлчилж ирснийг харуулж байгаа ч тулгамдсан асуудлууд хэвээр байгааг салбарын удирдлагууд онцолж байна.

Хүүхэд хамгааллын тухай хуулийн шинэ зохицуулалтаар 2025 оны нэгдүгээр сарын 1-нээс эхлэн сум, хороо бүрд хүүхэд, гэр бүлийн нийгмийн ажилтан ажиллах эрх зүйн үндэс бүрдсэн. Энэ хүрээнд Дорноговь аймгийн 14 сум бүгд нийгмийн ажилтантай болсон бөгөөд тэд газар дээр нь хүүхдийн асуудлыг сонсох, дамжуулах, шийдвэрлэхэд чухал үүрэг гүйцэтгэж эхэлжээ.

Гэвч хүний нөөцийн бүтэц, албан тушаалын тодорхойлолт батлагдаагүйгээс бодлогын мэргэжилтнүүдийн орон тоо дутмаг байгааг Хүүхэд, гэр бүлийн хөгжил хамгааллын газрын дарга Ш.Алимаа хэлсэн байна. Түүнчлэн байгууллага түрээсийн байранд байрладаг, хамгаалах үйлчилгээ үзүүлэх автомашингүй, сум, багийн ажилтнууд техник тоног төхөөрөмжийн дутагдалтай байгаа зэрэг бэрхшээлүүд бий. Сайд Л.Энх-Амгалан газар дээр нь ажиллаж, ажилтнуудын санал хүсэлтийг сонсож, салбар хоорондын уялдааг сайжруулах, нэгдсэн бодлогоор ажиллах нь чухал гэдгийг онцолсон.

Мөн хүүхэд хамгааллын ажилтай зэрэгцэн хүүхдийг хөгжүүлэх, тэдний санал санаачилгыг төрд хүргэх ажлыг мартаж болохгүй. Энэ хүрээнд хоёр жилд нэг удаа зохион байгуулагддаг “Хүүхдийн чуулган”-аар дамжуулан 14 сум тус бүрт хүүхдийн элч ажиллаж, хүүхдийн дуу хоолойг төрд хүргэдэг жишиг тогтжээ.

Эх сурвалж: Гэр бүл, хөдөлмөр, нийгмийн хамгааллын яам