Нийслэл хотын төлөвлөлт, тээврийн бодлогыг илүү нарийн, шинжлэх ухаанч байдлаар хөгжүүлэх зорилтын хүрээнд Улаанбаатар хотын удирдлагууд дэлхийн тэргүүлэгч PTV группийн төлөөлөгчидтэй уулзлаа. Энэхүү уулзалтад Автозамын түгжрэлийг бууруулах төсөл хөтөлбөрийн зохицуулагч Д.Бадарсан, Ерөнхий архитектор Ч.Төгсдэлгэр, Бодлого, төлөвлөлтийн газрын дарга П.Хадбаатар нар оролцож, авто зам, нийтийн тээврийн зохион байгуулалтыг хотын хөгжлийн төлөвлөлттэй хэрхэн уялдуулах талаар санал солилцсон байна.

PTV группийн Visum программ нь тээврийн бодит нөхцөл байдалд дүн шинжилгээ хийж, хэтийн эрэлтийг тооцоолж, олон хувилбарт загварчлал гаргадаг дэлхийн хэмжээнд хүлээн зөвшөөрөгдсөн систем бөгөөд Европ, Ази, Америк зэрэг олон улсад хэрэглэгддэг. Уг программ нь хотын дэд бүтцийн хөгжлийг төлөвлөх, түгжрэлийг бууруулах, нийтийн тээврийн хүртээмжийг сайжруулах зэрэг шийдвэр гаргалт, бодлого боловсруулахад тоон мэдээлэлд тулгуурласан шинжилгээний чухал хэрэгсэл болдог.

Уулзалтаар Улаанбаатар хотын ирээдүйн тээвэр, хот байгуулалтын бодлогыг тооцоо судалгаанд тулгуурлан боловсронгуй болгох чиглэлээр PTV групптэй хамтран ажиллах суурь тавигдаж байгаа юм. Цаашид тээврийн загварчлалын энэхүү шийдэл нь нийслэлийн дэд бүтцийн хөрөнгө оруулалтын үр ашгийг дээшлүүлэх, иргэдийн зорчих хөдөлгөөнийг хөнгөвчлөхөд бодит үр нөлөө үзүүлнэ гэж мэргэжилтнүүд үзэж байна.

Эх сурвалж: Нийслэлийн ЗДТГ