Монгол Улсын Ерөнхийлөгчийн ивээл дор зохион байгуулдаг Үндэсний номын баяр энэ сарын 16-18-нд буюу баасан гарагаас ням гарагт Д.Сүхбаатарын талбайд болно. Энэ удаагийн, 37 дахь удаагийн баярыг “Илүү их уншья” уриан дор зохион байгуулах бөгөөд уламжлал ёсоор ном, соёл, боловсролыг дэмжсэн олон талт арга хэмжээг өрнүүлэхээр төлөвлөжээ.
Баярын хүрээнд байгаль экологийн чиглэлээр хэвлэгдсэн 50 номыг олон нийтэд танилцуулахын зэрэгцээ “Мэргэн ном” цом, “Номын сайн нөхөр”-ийг шалгаруулах аж. Зохиолч, уншигчдын уулзалтаас гадна оюуны өмчийн зөвлөгөө, редакторын үйлчилгээ, номын маркетинг, клубт элсэх, уншлагын чиглэлээр зөвлөгөө авах гэх мэт мэдээлэл, үйлчилгээ бүхий буланг ажиллуулах бөгөөд ном бичих сонирхолтой хүмүүст зориулсан тусгай хөтөлбөр ч бий.
Мөн хүүхэд багачуудад зориулсан сонирхолтой арга хэмжээ, Мазаалай амьтныг онцолсон асрууд, зохиолчидтой биечлэн уулзаж, кофе, цай ууж, номын тухай ярилцах орчин байгуулна. Номын баярын гадаад харилцааг тэлж, БНСУ, БНХАУ, ОХУ зэрэг улсаас зохиолч, хэвлэн нийтлэгчид хүрэлцэн ирэх бол монгол бүтээлийг олон улсын үзэсгэлэнд хүргэх, гадаад зах зээлд экспортлох зорилтод “Либро сувд агентлаг”-ийн шинэ төсөл анхаарал татаж байна.
Энэ удаагийн номын баярт 300 мянга орчим хүн оролцоно гэсэн тооцоо гарсан бөгөөд оролцогчдын 80 хувь нь 30-аас доош насныхан байна. Тус баяр анх 2007 онд “Номын ертөнц” нэвтрүүлгийн хөтлөгч Б.Сувдын санаачилгаар эхэлсэн бөгөөд өнөөдөр “Номын соёлт ертөнц” ТББ-аас тогтмол зохион байгуулдаг улсын хэмжээний томоохон соёлын арга хэмжээ болон өргөжжээ.
Эх сурвалж: Номын соёлт ертөнц ТББ
