Нийслэлийн хэмжээнд ой, хээрийн түймрийн нөхцөл байдал, авч хэрэгжүүлж буй арга хэмжээний талаар нийслэлийн Онцгой байдлын газрын Гамшгаас урьдчилан сэргийлэх хэлтсийн дарга Д.Хадбаатар, нийслэлийн Байгаль орчны газрын Ойн хамгаалал хариуцсан мэргэжилтэн Г.Нацаг нар мэдээлэл өглөө.

Он гарсаар нийслэлийн хэмжээнд гурван удаагийн ой, хээрийн түймэр, 225 удаагийн шар өвсний гал түймэр бүртгэгдсэн бөгөөд энэ нь өнгөрсөн оны мөн үетэй харьцуулахад 3.5 дахин өссөн үзүүлэлттэй байна. Хуурайшилтын зэрэглэл нэн аюултай түвшинд хүрч, ойрын өдрүүдэд цаг агаар дулаарах төлөвтэй байгаа тул гал түймрийн эрсдэл улам нэмэгдэхээр байна.

Д.Хадбаатар хэлэхдээ, “Шар өвсний гал түймэрт нийт 108 эд хөрөнгө өртөөд байна. Үүнд 75 хашаа, 10 өвөл, зуны сууц, 10 гэр, 6 бие засах газар, 3 малын саравч, 2 чингэлэг, 1 хүлэмж, 1 автомашин багтаж байна. Гал түймрийн гол шалтгаан нь ил гал гаргах, татсан тамхиа унтраахгүй хаях, шар өвс шатаах, цахилгааны буруу угсралт, гагнуурын оч зэрэг үйлдэлтэй холбоотой байна” гэв.

Нийслэлийн ногоон бүсэд зорчихыг гуравдугаар сарын 20-ноос зургаадугаар сарын 10 хүртэл хориглосон захирамж гарсан тул иргэдийг сонор сэрэмжтэй байж, ил задгай гал гаргахгүй байхыг онцгойлон анхаарууллаа. Мөн ЕБС, их, дээд сургуулийн төгсөлтийн баярт оролцогчид ногоон бүсэд зорчихгүй байхыг санууллаа.

Нийслэлийн Байгаль орчны газрын мэргэжилтэн Г.Нацаг мэдээлэхдээ, “Ногоон бүсийн таван чиглэлд урьдчилан сэргийлэх хөдөлгөөнт эргүүлийн арга хэмжээг гуравдугаар сарын 20-ноос хэрэгжүүлж эхэлсэн. Энэ хугацаанд болзошгүй эрсдэлийн 23 түймрийг шуурхай унтрааж, Онцгой байдлын байгууллагатай хамтран 21 түймрийг бүрэн унтраалаа. Байгаль орчны газраас 49 албан хаагч, амралтын өдрүүдэд ч жижүүрлэн ажиллаж байна. Мөн орон нутгийн 60 иргэнийг урамшуулалт эргүүлд татан оролцуулсан” гэлээ.

Нийслэлийн ногоон бүсэд хуурайшилт их, хур тунадас бага байгаа тул иргэд оч баригчгүй техник хэрэгсэлтэй зорчихгүй байх, ил задгай гал гаргахгүй байх, хашаа гагнах, засвар хийх үед галын аюулгүй байдлыг бүрэн хангахыг мэргэжлийн байгууллагууд сэрэмжлүүлж байна.

Эх сурвалж: НОБГ, НБОГ