Дэлхийд алдартай Колумбын дуучин Шакира “Las Mujeres Ya No Lloran World Tour” аялан тоглолтынхоо хүрээнд Киргизийн нийслэл Бишкек хотноо тоглолтоо хийжээ. 

Түүний тоглолт шинээр ашиглалтад орсон "Бишкек Арена" цэнгэлдэх хүрээлэнд 10 дугаар сарын 18-ны ням гаригт болжээ.  Шакира Төв Азид анх удаа тоглолтоо хийсэн бөгөөд дэлхийн 33 орны үзэгчид хуран цугларснаас Казахстан, ОХУ, Узбекистанаас хамгийн олон шүтэн бишрэгч нь хүрэлцэн ирсэн байна. 

Шакира тоглолтынхоо үеэр “Hips Don’t Lie”, “Waka Waka”, “Whenever, Wherever” зэрэг олонд танигдсан хит дуунуудаа толилуулсан байна.

Тоглолтын эхэнд дуучин бүсгүй киргиз хэлээр “Кутман кеч, Бишкек! Кандайсыңар?” (Оройн мэнд, Бишкек! Сайн байцгаана уу?) хэмээн мэндчилжээ. Шоуныхаа төгсгөлд Шакира үзэгчдэд хандан халуун дотноор хүлээн авсанд талархал илэрхийлсэн байна.

Тоглолт болсон өдөр Киргизийн Аялал жуулчлалыг хөгжүүлэх улсын агентлагийн тэргүүн Эдуард Кубатов Шакирагийн тоглолтын бүх тасалбар борлуулагдаж дууссаныг мэдэгджээ.

Энэхүү тоглолт гадаадын 30 мянга орчим жуулчдыг татаж, Киргизийн эдийн засагт 30 орчим сая ам.долларын орлого оруулах төлөвтэй байгааг өмнө нь мэдээлж байв.

Kazinform