Боловсролын сайд Л.Энх-Амгалан КОЙКА-гийн Суурин төлөөлөгч Жу Хэйн Нантай уулзаж, сургуулийн хоол үйлдвэрлэлийн төслийн хэрэгжилтийн талаар санал солилцжээ.

Уулзалтаар КОЙКА-гийн 8 сая ам.долларын буцалтгүй тусламжаар хэрэгжүүлж буй ерөнхий боловсролын 10 сургууль болон ШУТИС-ийн "Хүүхдийн хоол шим тэжээл, сургалт арга зүйн үндэсний төв"-д засвар, тоног төхөөрөмж нийлүүлэх төслийн явц, цаашдын хамтын ажиллагааны талаар хэлэлцэв.

Манай улс сургууль, цэцэрлэгийн хоол үйлдвэрлэлийн тогтолцоог бүтнээр нь бий болгохыг зорин ажиллаж байна. Энэ хүрээнд сум, аймаг, дүүрэг, нийслэлийн онцлогт тохирсон хоол үйлдвэрлэлийн гурван өөр загварыг хэрэгжүүлэх шаардлагатай байгааг Боловсролын сайд Л.Энх-Амгалан онцоллоо. Мөн ШУТИС-ийн дэмжих төв нь маш үр дүнтэй, чухал ажил болж байгааг тэмдэглээд, цаашид тус төвөөр дамжуулан мэргэжлийн экспертүүдийг ажиллуулах саналыг тавилаа.

Дэлхийн түвшинд Монгол улс "School Meals Coalition" (Дэлхийн сургуулийн хоолны эвсэл)-ийн гишүүнээр эгнээгээ тэлж, сурагчдын хоол, шим тэжээлийг сайжруулах чиглэлээр олон улсын хамтын ажиллагаагаа өнгөрсөн ЮНЕСКО-гийн уулзалтын үеэр баталгаажуулсан.

КОЙКА-гийн төслийн хүрээнд 10 сургууль ШУТИС-ийн Хүүхдийн хоол шим тэжээл, сургалт арга зүйн үндэсний төвд засвар, тоног төхөөрөмж нийлүүлэхээс 2025 онд гурван сургууль болон ШУТИС-ийн сургалтын төвийн их засвар бүрэн дуусжээ. Харин  2026 онд дөрвөн сургуулийн ажил үргэлжилж байгаа аж.

Уулзалтын үеэр талууд төслийн явцтай нарийвчлан танилцаж, өмнө тулгарсан зарим зохицуулалтын асуудлыг шийдвэрлэх, төслийг эрчимжүүлэх, хуваарийн дагуу шуурхай үр дүнтэй хэрэгжүүлэхээр санал нэгдэв.