Японы Айчи мужийн Нагояа хотод Азийн зуны спортын V пара наадам өчигдөр нээлтээ хийлээ.

“Paloma Mizuho Sports Park” цэнгэлдэхэд болсон нээлтийн ёслолд 45 улсын тамирчдын төлөөлөл жагссан бол манай улсаас тамирчид, албаныхан нийлсэн 38 төлөөлөл оролцсон байна. Энэ удаагийн наадамд Монгол Улсаа төлөөлөн 10 спортын төрөлд 44 тамирчин, нэг хөтөч тамирчны бүрэлдэхүүнтэй оролцож байна. Монголын багийн тугч хөдөлмөрийн баатар, гавьяат тамирчин Э.Содномпилжээ төрийн далбааг цэнгэлдэхэд залав.

Пара наадмын нээлтэд Япон Улсын Цог Жавхлант Эзэн Хаан Нарүхито, Эрхэм дээд Хатан Масако, ханхүү Хисахито нар оролцсон байна. Энэ удаагийн пара наадмын нээлт “WABI - We are Beautiful Individuals” уриан дор болжээ. Тодруулбал, хүн бүрийн онцлог зан чанар, ялгаатай байдлыг хүндэтгэх агуулгаар зохион байгуулсан юм байна. Ёслолыг найруулагч Ёои Күрисүгийн “Ялгаатай ч хамтдаа” гэсэн агуулгад нээлтийг найруулсан аж.

Өнөөдөр ширээний теннис, бочи, байт харваа, жүдо, хөнгөн атлетик, таеквондогийн төрөлд манай тамирчид өрсөлдөнө.

Фотог: Монголын спортын сэтгүүлчдийн холбооны гишүүн, гэрэл зурагчин Ж.Адилбиш