Улсын хэмжээнд 2025 оны тавдугаар сарын 14-ний байдлаар 2070 объектын гал түймэр бүртгэгдсэн бөгөөд үүнээс 309 нь өнжмөл шар өвсний түймэр байжээ. Энэ нь нийт гал түймрийн 15 хувийг эзэлж байна. Объектын гал түймрийн тоо өнгөрсөн оны мөн үеэс 26.8 хувиар өссөн боловч хүний амь нас эрсэдсэн тохиолдол 31.2 хувиар буурсан үзүүлэлттэй байна. Улаанбаатар хотод нийт шар өвсний түймрийн 79.3 хувь нь бүртгэгдээд байгаа нь нийслэлийн гал түймрийн голомт хэвээр байгааг харуулж байна.

Харин ой, хээрийн гал түймэр 12 аймгийн 58 сум, нийслэлийн 3 дүүрэгт нийт 87 удаа гарсан бөгөөд энэ нь өмнөх оны мөн үетэй харьцуулахад 34.5 хувиар өссөн үзүүлэлттэй байна. Ойн 47 мянга, хээрийн 701 мянган га талбай өртөж, нийт 748 мянга орчим га талбай шатжээ. Үүнээс гадна 5 байшин, 49 гэр, 4 автомашин, 7 мотоцикл, 99 малын хашаа, 12 өвөлжөө, 7230 боодол өвс, 80 шуудай тэжээл, 5934 бог, 395 бод мал хохирч, нийт хохирлын хэмжээ 4.3 тэрбум төгрөгт хүрээд байна.

Одоогоор Сэлэнгэ аймгийн Ерөө сумын “Майн-Зоо” гэдэг газарт гарсан ойн түймэрийг унтраахаар 263 хүн, 30 автомашин, 300 гаруй техник хэрэгсэлтэйгээр үүрэг гүйцэтгэж байна. Түймрийн баруун хойд хэсэг хяналтад орсон боловч бусад чиглэлд цурам тавих ажил үргэлжилж байгаа бөгөөд урьдчилсан байдлаар 11915 га талбай өртжээ.

Ойрын хугацаанд хуурайшилтын зэрэг өндөр хэвээр байгаа тул иргэдийг сонор сэрэмжтэй байхыг, байгальд зугаалах, хог шатаах, ил гал гаргах, галын аюулгүй байдлыг зөрчихгүй байхыг Онцгой байдлын байгууллагаас анхааруулж байна.

Эх сурвалж: УОК, ОБЕГ