Pixar болон Walt Disney компанийн хамтын бүтээл “Тоглоомын түүх” хүүхэлдэйн киноны дөрөвдүгээр анги ирэх жил нээлтээ хийнэ. Хүүхэд бүрийн үзэх дуртай “Тоглоомын түүх” хүүхэлдэйн киноны гуравдугаар анги гарснаас хойш хэдийн найман жил өнгөрчээ. Тус ангид тоглоомын эзэн Энди хүү том болж, тэднийг бяцхан охин Боннид шилжүүлэн өгснөөр дуусдаг билээ.
Pixar кино компаниас “Тоглоомын түүх 4”-ийн трэйлерийг өчигдөр олны хүртээл болгон, хүлээлт үүсгэлээ. Энэ ангид бидний сайн мэдэх Вүүди, Бааз, Жесси, ноён болон хатагтай төмсөн толгойт, сунадаг нохой зэрэг танил болсон баатрууд дээр “Сэрээхэн” хэмээх шинэ дүр нэмэгджээ.
“Тоглоомын түүх 4”-ийн найруулагчаар "Inside out" хүүхэлдэйн киноны найруулагч Жош Күүли ажиллаж байгаа бөгөөд тэрээр киноны тухай: “Өөрийнхөө амьдралд сэтгэл хангалуун байдаг Вүүди эзэн нь Энди эсвэл Бонни гэдгээс үл хамааран хүүхдүүдэд хайртай хэвээр байх болно. Угтаа бол тоглоомын үүрэг нь хүүхдийн үнэнч найз байх явдал билээ. Харин Бонни охин Сэрээхэн хэмээх шинэ тоглоомыг авчирснаар тогтсон ойлголтууд үндсээрээ өөрчлөгдөж, киноны гол дүрүүд маань шинэ найзтайгаа хамт сонирхолтой адал явдалтай учирч, хорвоо ертөнц дэндүү том болохыг ойлгох болно” гэжээ.
Вүүди болон түүний найз нарын шинэхэн танилтай хийх адал явдлыг 2019.06.21-ны өдөр Дэлхий даяар хүлээн авч үзэхнээ. Одоо хүлээх л үлдэх шив.
Эх сурвалж: ВВС
