Өнгөрсөн амралтын өдрөөс Дэлхий дахины рок хөгжмийн шүтээн Queen хамтлагийн дуучин Фредди Меркуригийн дүрийг тод томруун харуулсан “Bohemian Rhapsody” кино бүтээлээр давалгаалж байна.

Бид бүхний сайн мэдэх Английн домогт Queen хамтлаг тэр дундаа хамтлагийн дуучин Фредди Меркуригийн тухай өгүүлсэн “Bohemian Rhapsody” кино энэ сарын 2-ны өдөр дэлхий даяар нээлтээ хийлээ. "20th Century Fox” студиэс бүтээж байгаа уг кинонд Queen хамтлагийн 15 жилийн түүхийг өгүүлсэн ба байгуулагдсан цагаас нь эхлэн 1985 оны Live Aid концерт хүртэл үзүүлжээ. Киноны гол дүрд Рами Малек тоглосон юм.

Нээлтээ хийсэн даруйдаа Box Office-оос 13 сая ам.долларын ашиг олж, дэлхийн кино урлагийн зах зээлээс одоогийн байдлаар 141, 7 сая ам.долларын ашиг олоод байна. Уг бүтээлийг хийхэд компаниас нийт 52 сая ам.доллар зарцуулсан гэдэг.

"Bohemian Rhapsody" кино дэлхийд 96 хувийн буюу маш өндөр үнэлгээтэй байгаа юм. Энэ нь продюссер Грахам Кинг, киноны ерөнхий найруулагчаар ажилласан Брайн Сингер нарын урьдчилан таамагласнаас илүү байгаа гэнэ. Кино шүүмжлэгчид төдийгүй үзэгчдийн хүлээлтэнд хүрсэн "Bohemian Rhapsody" киноны ашиг нээлтээ хийсэн долоо хоногтоо ийм өндөр байгаа нь цаашид ч өсөх магадлал ихтэйг нь илтгэж байна.