Албан үүргээ гүйцэтгэж яваад харамсалтайгаар амиа алдсан цагдаагийн ахлах ахлагч Д.Батсайханы гэр бүлийнхэнд Ерөнхий сайд У.Хүрэлсүх болон ЦЕГ-ын дарга С.Баатаржав нар дөнгөж сая хоёр өрөө байрны гэрчилгээг нь гардуулан өглөө. 

Талийгаачийн ар гэрийнхэнд олгох орон сууцны асуудлыг өнөөдрийн Засгийн газрын хуралдаанаар шийдвэрлэсэн юм. Улмаар дөнгөж сая СХД-ийн зургаадугаар хороонд байрлах "Очир" хотхонд 60мк шинэ хоёр өрөө байрны гэрчилгээг нь гардуулан өглөө. 

Ерөнхий сайд У.Хүрэлсүх талийгаачийн том хүүд "Танай аав бол жинхэнэ эх оронч хүн байсан шүү. Ааваараа байнга бахархаж яваарай. Жинхэнэ цэрэг байсан юм шүү." хэмээн хэлээд хатуужилтай, сайн эр хүн болж өсөхийг хүсэн ерөөлөө.

Талийгаачийн том хүү Б.Цолмонбаяр "Ирээдүйд цагдаагийн алба хаагч болох хүсэл мөрөөдөлтэй" гэдгээ хэлэв. Мөн талийгаачийн ээж болон эхнэр нь Ерөнхий сайдад баярласнаа илэрхийллээ. 

Талийгаач 41 настай байсан бөгөөд Сүхбаатар дүүргийн цагдаагийн хоёрдугаар хэлтэст ажилладаг. Ирэх жил тэтгэвэртээ гарахаар бүх материалаа бүрдүүлээд өгсөн байсан юм. Гэвч гэмт этгээдүүдийн халдлагад өртөж амиа алдсан. Талийгаач эхнэр, 2-14 насны дөрвөн хүүхэд, ээжийнхээ хамт ахынхаа хашаанд амьдардаг байжээ. Ар гэрийнхэний зүгээс орон байрны асуудлыг шийдэж өгөхийг хотын даргаас хүсч байсан юм. Ерөнхий сайд У.Хүрэлсүх талийгаачийг сүүлчийн замд нь үдэх өдөр орон сууцны асуудлыг шийдвэрлэж өгөхөө амласныхаа дагуу ийнхүү 2 өрөө байрны түлхүүр, гэрчилгээг нь гардуулан өглөө.