Сургууль цэцэрлэгийн ойр орчны хүүхдүүд хамгийн ихээр зорчдог цэгүүдэд “Хүүхэд хамгаалагч” иргэдийг эргүүлд гаргахаар болжээ. Ингэснээр гэрэлтүүлэг муутай, цагдаа нар бүрэн хяналтандаа авч чаддаггүй цэгүүдэд эцэг эхчүүдийг эргүүлд гаргаж хүүхдийг хамтдаа аюулгүй орчинд зорчуулах боломжийг бүрдүүлнэ гэж үзэж байгаа юм. Тодруулбал “School police” хөтөлбөр хэрэгжээд таван жил болоход сургуулийн орчинд гарах зам тээврийн осол даруй 50 орчим хувиар буурсан байна. Ийм учраас сургуулийн орчны “эмзэг” цэгүүдэд эцэг эхчүүд эргүүлд гарснаар хүүхэд гэмт хэрэгт холбогдох, гэмт хэргийн хохирогч болохоос урьдчилан сэргийлэх боломжтой гэж ЦЕГ-аас үзэж байна.
Мөн ЦЕГ-аас эргүүлд гарах эцэг эхчүүдэд цалинтай чөлөө олгох, тэднийг эрх зүйн байдлыг хамгаалах, иргэдтэй өдөр тутам хамтран ажиллах зохицуулагч иргэнийг тухайн хорооноос сонгох гэх мэтээр үргэлжлэх юм байна. Эргүүлд гарах эцэг эх хичээл эхлэх, тарах цагаар хоёроос гурван цагийн хугацаанд эргүүлд гарах юм байна.
2018 он есдүгээр сарын байдлаар хүүхдийн үйлдсэн гэмт хэрэг 592, хүүхэд гэмт хэрэгт холбогдсон 604 тохиолдол бүртгэгдсэн байна. Энэ нь өнгөрсөн оны мөн үеэс 31 хэргээр нэмэгдсэн байна. “Хүүхэд хамгаалагч” эргүүлийг Сонгинохайрхан дүүргийн 18, Баянзүрх дүүргийн 5-р хороонд хэрэгжүүлэхээр болсон бөгөөд уг төсөл амжилттай хэрэгжвэл нийслэлийн болоод орон нутгийн бүх сургуульд хэрэгжих юм байна.
