Нийслэлийн хэмжээнд 2018 оны хоёрдугаар ээлжийн хугацаат цэрэг татлага 10 дугаар сарын 19-21-ний өдрүүдэд явагдах гэж байна. Энэ талаар өнөөдөр Цэрэг татлагын товчооноос өргөтгөсөн хурал хийлээ.
"Цэрэг татлагыг зохион байгуулахаар нийт 2,223 хүн ажиллаж байна. Цэрэг татлагын байруудыг камержуулан иргэдэд LED дэлгэцээр харуулахад бэлэн болсон байна. Улсын хэмжээнд зарлан дуудах, мэдэгдэх хуудас 95.9 хувь нь эзэндээ хүрсэн гэлээ.
Мөн нийслэлийн хэмжээнд цэргийн албыг мөнгөөр дүйцүүлэн төлүүлэх ажил 92.6 хувьтай байгаа. 1-р ээлжээс халагдаж ирсэн дайчдыг ажлын байранд хамруулсан. 32 ААН 2,000 гаруй ажлын байрны саналаа танилцуулсан хэмээн цэрэг татлагын комиссоос мэдээллээ.
Харин цэргийн албанд залуус эрүүл мэндийн шалтгаанаар тэнцэхгүй байгаа талаар Нийслэлийн эрүүл мэндийн газрын дарга мэдээлэл өглөө.
Тэрбээр "2018 оны нэгдүгээр ээлжийн цэрэг татлагаас 4,800 иргэн эрүүл мэндийн шалтгаанаар чөлөөлөгдсөн. Цэргийн албанд тэнцээгүй шалтгааныг аваад үзвэл чих, хамар хоолой, дотрын өвчин өндөр хувийг эзэлсэн. Мөн нүд, мэдрэл, харшил, сэтгэцийн эмгэгийн улмаас чөлөөлөгдөж байна.
Биедээ олон шивээс, олон ээмэг зүүлт зүүсэн нь сэтгэцийн эмгэгээр хасагдах шалтгаан болж байна.
Өвчний улмаас чөлөөлөгдсөн залууст зөвлөгөө өгөхөөр дууддаг ч ирдэггүй. Эрүүлжүүлэх арга хэмжээнд ирээгүй хүмүүст хариуцлага хүлээлгэдэг эрхзүйн орчин бүрдүүлэх хэрэгтэй.
Цэргийн албанд тэнцээгүй залуусыг эрүүлжүүлэх ажил 86 хувьтай байгаа" гэв.
ЦЭРЭГ ТАТЛАГЫН БАЙРАНД ИРЭХДЭЭ АВЧ ИРЭХ БАРИМТ БИЧГҮҮД
-
Иргэний үнэмлэх
-
Цэргийн үүрэгтний үнэмлэх
-
Эрүүл мэндийн болон нийгмийн даатгалын дэвтэр
-
Оюутнууд их, дээд сургуульд сурч байгаа сургуулийн тодорхойлолт, сургалтын төлбөр төлсөн баримт, оюутны үнэмлэх
-
Мэргэжил эзэмшсэн бол мэргэжлийн үнэмлэх, сургууль төгссөн дилпом зэрэг баримт бичгийг биедээ авч, цэрэг татлагын байранд тогтоосон хугацаанд ирэх үүрэгтэй.
ДҮҮРГҮҮДИЙН ЦЭРЭГ ТАТЛАГЫН БАЙР
-
Баянгол дүүрэг: “Оюуны ундраа" цогцолбор сургууль /96-р сургууль/
-
Банязүрх дүүрэг: Ерөнхий боловсролын 14-р дунд сургууль
-
Сүхбаатар дүүрэг: Ерөнхий боловсролын 31-р дунд сургууль
-
Сонгинохайрхан дүүрэг: “Ирээдүй” цогцолбор сургууль /83-р дунд сургууль/
-
Хан-Уул дүүрэг: Ерөнхий боловсролын 34-р дунд сургууль
-
Чингэлтэй дүүрэг: Ерөнхий боловсролын 5-р дунд сургууль
-
Налайх дүүрэг: Мэргэжил, сургалт үйлдвэрлэлийн төв
-
Багахангай дүүрэг: “Хангай" цогцолбор сургуульд тус тус цэрэг татлагыг зохин байгуулахаар бэлджээ.
