ХХААХҮЯ-ны Төрийн нарийн бичгийн дарга Д.Энхбат НҮБ-ын Хүнс, хөдөө аж ахуйн байгууллага болон Монгол улсын мал эмнэлгийн байгууллагын тархвар зүйн мэргэжилтнүүдийг хүлээн авч уулзлаа. Уг хоёр байгууллагын хамтарсан баг Хүнс, хөдөө аж ахуй, хөнгөн үйлдвэрийн харьяа Мал эмнэлгийн ерөнхий газрын хүсэлтийн дагуу манай улсын мал эмнэлгийн салбарын тархвар зүйн өнөөгийн байдал, чадавхид үнэлгээ хийснээ танилцуулсан юм.

Тархвар зүйн судалгаа, шинжилгээ, тооцоолол нь мал, амьтны өвчнөөс урьдчилан сэргийлэх арга хэмжээний төлөвлөгөө боловсруулах, өвчний эрсдэлийн үнэлгээ хийх, тархвар зүйн нотолгоонд тулгуурлан дархлаажуулалт болон өвчинтэй тэмцэхэд шаардлагатай бодлого боловсруулах, шийдвэр гаргахад нэн шаардлагатай арга хэрэгсэл аж.

Хамтарсан баг үнэлгээ хийхдээ Мал эмнэлгийн ерөнхий газар, Улсын мал эмнэлэг, ариун цэврийн төв лаборатори, Халдварт өвчин судлалын үндэсний төв, түүний харьяа тархвар зүйн төв, Зэрлэг амьтан хамгаалах олон улсын нийгэмлэг, Дархан-Уул, Орхон аймгийн мал эмнэлгийн алба, тасаг, хувийн малын эмч нар, малчид зэрэг олон талын оролцоог хангаж, үндэсний болон орон нутгийн түвшинд явагдаж буй мал эмнэлгийн тархвар зүйн үйл ажиллагаатай танилцаж, манай улсын мал эмнэлгийн салбарын тархвар зүйн давуу болон сул талыг тодорхойлсны үндсэн дээр үнэлгээ хийж, зөвлөмж өгчээ.

Мал, амьтны эрүүл мэндийн тухай хуулийн дагуу нийслэл, 21 аймгийн мал эмнэлгийн газар, 331 суманд тархвар зүйч ажиллаж, гоц халдварт, халдварт болон малаас хүнд халдварладаг өвчнөөс урьдчилан сэргийлэх арга хэмжээ авах юм. Үүнтэй холбогдуулан мал эмнэлгийн салбарын тархвар зүйн өнөөгийн байдал, чадавхид үнэлгээ хийсэн нь энэ чиглэлээр олон улсын жишигт нийцсэн үйл ажиллагаа явуулах урьдач нөхцөл бүрдлээ гэж талууд үзэж байна.  

Эх сурвалж: ХХААХҮЯам