Өчигдөрөөс эхлэн иргэдийн мэдээллийн дагуу зөрчилд торгууль оногдуулахаар бол болсон. Явган хүний зам дээр машинаа байрлуулсан, орц гарц хаасан, урсгал сөрсөн зэргээр замын хөдөлгөөний дүрэм зөрчсөн тухай иргэдээс ирүүлсэн зургаар баримтжуулсан мэдээллээр тухайн жолоочид хариуцлага тооцож, торгууль оногдуулахаар журамласан юм. 

Иргэд E-Police аппликейшнийг утсандаа татан суулгаад, утасныхаа камераар бус аппликейшнээр газар дээр нь зургаа аваад илгээх боломжтой. Өөрийн утасны зургийн санд хадгалсан зургаас оруулах боломжгүй тул зөрчлийн зураг нь тухайн цаг мөчийнх гэдэгт эргэлзэх шаардлагагүй гэнэ.

ЗААВАР: 

1. E-Police аппликейшн-д утасны дугаараа хийн нэвтрэх

2. "Зөрчил мэдээлэх" товч дээр дарах

3. Зургаа авах /Та 3 хүртэлх зургаар зөрчлийг баримтжуулах боломжтой/

4. Зургаа илгээх

Иргэдийн мэдээллийг хүлээн авах E-Police аппликейшнийг Замын хөдөлгөөний удирдлагын төв, тээврийн цагдаагийн газар, нийслэлийн Мэдээллийн технологийн газартай хамтран хийсэн байна.

Энэ тухай нийслэлийн Засаг даргын орлогч П.Баярхүү “Өнөөдөр 300 гаруй цагдаа хянаж чадахгүй байгаа учраас иргэд бие биеэ хянадаг болно. Иргэд дүрэм зөрчсөн бүхний зургийг нь явуулж, тэр нь гэрийнх нь хаягаар торгуул болж очоод байвал бид Улаанбаатар хотыг бүхэлд нь хянах боломжтой болно. Ингэснээр хөдөлгөөнд соёлтой оролцож, замын хөдөлгөөний дүрэм биелэгдэж эхэлнэ" хэмээн тайлбарлажээ.

Энэ аппликейшн нь 4G буюу интернетэд холбогдоогүй үеэд ажиллахгүй юм байна.