УИХ дахь эмэгтэй гишүүдийн албан бус бүлгийн санаачилгаар Монгол Улсын 2018 оны нэгдсэн төсөвт хүүхэд хамгаалал, хөгжилт хөтөлбөрийн хүрээнд өмнөх жилийн төсвөөс даруй таван тэрбум төгрөгийг нэмж суутгуулсан билээ. Ингэснээр энэ оны улсын төсөвт хүүхдийн хүчирхийллийн эсрэг, тэднийг хамгаалахад нийт 5.8 тэрбум төгрөгийг зарцуулахаар болсон байдаг.

Тэгвэл өнгөрсөн хагас жилийн хугацаанд дээрх төсвийн 2.2 тэрбум төгрөгийг нь зарцуулжээ. Ингэхдээ ихэнх мөнгийг нь төрийн бус байгууллагуудтай гэрээ, санамж бичиг байгуулахад зарцуулсан байна. Энэ талаар УИХ-ын гишүүн З.Нарантуяа өнөөдөр мэдээлэл хийлээ.

Тэрээр "Өнгөрсөн долоо хоногт Монгол Улсын Ерөнхийлөгч хүүхэд хамгааллын асуудлаар төрийн байгууллагын удирдлагуудтай уулзаж ярилцах үед 2017 онд 1752 хүүхэд, 2018 онд өмнөх оны мөн үеийнхээс 40 хувиар өссөн тухай тоо мэдээлэл өгсөн. Энэ нь хүүхдийн эсрэг хүчирхийлэл, хүүхдийн эрхийг зөрчих гэмт хэрэг, зөрчил буурахгүй, эсрэгээр нэмэгдэж байгааг харуулж байна" гэв.

Түүнчлэн тэрээр "Хүүхэд гэмт хэрэг, зөрчилд өртөж байгаа шалтгаан буурахгүй байгаа талаар ярьж байгаагийн учир нь 2018 оны улсын нэгдсэн төсөвт хүүхэд хамгаалал, хөгжил хөтөлбөрийн хүрээнд өмнөх жилийн төсвөөс даруй 5 тэрбум төгрөгийг УИХ дахь эмэгтэй гишүүдийн албан бус бүлгээс суулгуулсан. Харин Ерөнхий сайдаас ирүүлсэн асуулгын хариуд Гэр бүл, хүүхэд, залуучуудын хөгжлийн газрын 2018 оны төсөвт хүүхэд хөгжил, хамгааллын хөтөлбөрийг хэрэгжүүлэхээр тусгасан 5.8 тэрбум төгрөгийн зарцуулалтын талаар мэдээлэл ирүүлсэн бөгөөд эхний хагас жилийн хугацаанд 2.2 тэрбум төгрөгийг зарцуулсан байна.

Ингэхдээ бодлого, төлөвлөлт, зохицуулалт, салбар дундын хамтын ажиллагааг сайжруулахад 9.9 хувь, хууль, тогтоомж, бодлого, хөтөлбөрийн хэрэгжилтийг хангах зохион байгуулалтад 12.6 хувь, хүүхэд хамгааллын үйлчилгээний төвүүдийг бэхжүүлэхэд 13.7 хувь, олон нийтийн ойлголт, хандлагыг дээшлүүлэх, нөлөөлөл, сурталчилгаанд гурван хувь, төрийн бус байгууллагуудтай гэрээ, санамж бичгийн хүрээнд зарцуулсан зардал 23.9 хувь, орон нутаг, нийслэл, дүүргийн хүүхндийн хөгжил, хамгааллын үйлчилгээнд 36.5 хувийг зарцуулаад байгаа мэдээлэл ирүүлсэн" хэмээн ярилаа.