Apple компани есдүгээр сарын 12-нд шинэ загварын IPhone гар утсаа олон нийтэд танилцуулахаар болжээ. Шинэ бүтээгдэхүүн танилцуулах үйл ажиллагаа "Steve Jobs" театрт зохиогдох аж. Энэ өдөр шинэ загварын iPhone, "Series 4" ухаалаг цаг, iPad Pro зэрэг бүтээгдэхүүнүүд танилцуулагдах юм байна.
Цахим ертөнцөд цацагдсан дээрх зураг нь шинэ загварын "iPhone XS" утас нь 5.8 болон 6.5 инч гэсэн хоёр төрлийн хэмжээтэй ба алтлаг (Gold) өнгийн загвартай гарах болсныг батлаад байна.
Түүнчлэн шинэ загварын iPhone утас 3D мэдрэгчгүй байх магадлалтайг зарим эх сурвалжууд мэдээллэсэн юм . Харин шинэ загварын "Series 4" ухаалаг цаг өмнөх загваруудаас илүү том дэлгэцтэй, нарийн мэдээлэл боловсруулах чадвартай зүрхний хэмнэл мэдрэгчтэй болсон тухай мэдээлэл цацагджээ.
Харамсалтай нь эх сурвалжууд өөр ямар нэгэн тодорхой мэдээлэл хуваалцаагүй юм. Тиймээс бид тун удахгүй Apple компанийн албан ёсны төлөөлөгчдөөс илүү дэлгэрэнгүй мэдээлэл авна гэж найдъя.
Apple наймдугаар сард их наяд ам.долларын үнэлгээнд хүрсэн АНУ-ын анхны компани болсон билээ.1980 онд нээлттэй компани болсноос хойш хувьцаа нь 40,000 гаруй хувиар өссөн юм. Харин 2018 оноос хойш тус компанийн хувьцаа 31 хувиар өсөөд байна.
