Монголын оюутны байгууллагууд нэгдэн энэ баасан гарагт буюу наймдугаар сарын 31-нд тайван жагсаал зохион байгуулахаа мэдэгдлээ. Учир нь “Ардчилсан оюутны холбоо”-оос их, дээд сургуулиудын удирдлагуудад хүргүүлсэн шаардлагын хариуд сургалтын төлбөрөө бууруулах боломжгүй хэмээн мэдэгдсэн байна. “Ардчилсан оюутны холбоо” энэ сарын 15-нд нийт 84 их, дээд сургуульд долоон асуулга бүхий албан шаардлага хүргүүлснээс 35 сургуулиас хариу ирүүлжээ. Их, дээд сургуулиуд сүүлийн гурван жил сургалтын төлбөрөө огт нэмээгүй болохоо албан шаардлагын хариуд дурдсаныг бодит бус хэмээн үзэж байгаагаа оюутнууд энэ үеэр илэрхийлсэн юм. Улмаар өнөөдөр буюу наймдугаар сарын 27-нд “Ардчилсан оюутны холбоо”-ноос  БСШУС-ын сайд болон их, дээд сургуулиудын удирдлагуудад дахин албан шаардлага хүргүүлж буйгаа мэдэгдлээ. Хэрэв шаардлагын хариуг товлосон хугацаанд ирүүлэхгүй бол энэ баасан гарагт оюутны байгууллагууд нэгдэн тайван жагсаал зохион байгуулах юм байна. Түүнчлэн сургалтын төлбөр нэмэгдсэн ч багш, ажилчдын цалин, сургалтын орчинд өөрчлөлт гарахгүй байгаа тул багш нарын ажил хаялттай нэгдэхээ ч мэдэгдэв.

ИХ, ДЭЭД СУРГУУЛЬ МӨНГӨ УГААХ САЛБАР БОЛООД БАЙНА

Ардчилсан Оюутны Холбоо-ны Ерөнхийлөгч Н.Лхагвадорж “Их, дээд сургуулиудын хичээлийн кредит цагийн төлбөрийн нэмэгдэл оюутны хөгжлийг сайжруулж чанартай боловсон хүчин бэлтгэх үндсэн зорилгоос хазайж байна. Энэ нь хэт ашиг олох сэдэлд автсан хэсэг бүлэг хүмүүсийн мөнгө угаах салбар болсон байх магадлалтай.

Тус холбооноос их, дээд сургуулиудад тавьсан долоон асуултыг хүргэж байна.

1. Сургалтын төлбөрийн нэмэгдлийн зорилго юу вэ?

-Оюутны хөгжлийг нэмэгдүүлэх, Багш ажилчдын ур чадварыг сайжруулж, сурч боловсрох орчин, тэдэнд чиглэсэн төсөл хөтөлбөрүүдийг нэмнэ.

2. Сургалтын төлбөрөө нэмсэн бол багш нарын цалин нэмэгдэх үү? /Хэдэн хувиар нэмэгдэх вэ/

-Багш нарын ажилласан жил, ур чадвараас хамаарч цалинг нэмнэ. Тухайлбал ШУТИС 10 хувь, Этүгэн 10-15%, Урлах эрдэм 12-25% иар нэмнэ гэсэн бол МУИС цалинг нэмэхгүй гэв.

3. Сургалтын төлбөр нэмэгдсэнээр багш нарын ур чадвар нэмэгдэж чадах уу?

-Уг асуултын хариуг дээрх хоёр хариултад дурдагдсан болно.

4. Сургалтын төлбөр нэмэгдсэнээр оюутанд үзүүлэх хөнгөлөлт, тэтгэлэг нэмэгдэх үү?

-МУИС, Этүгэн, Батлан Хамгаалах Их Сургууль зэрэг 14 их сургууль энэхүү асуултад хариу өгсөн байна. Тодруулбал МУИС энэ оны байдлаар 109.7сая төгрөгийг тэтгэлэгт нэмэгдүүлж байна.

5. Сургалтыг төлбөрийн нэмэгдэл өөрчлөлтийг оюутнуудтай зөвшилцсөн үү?

-Манай сургууль оюутны сургалтын төлбөрийн нэмэгдлийг өөрийн сургуулийн оюутнуудтай зөвшилцсөн гэсэн хариуг өгсөн бол зарим сургуулиуд оюутны холбооны удирдах зөвлөлийн гишүүд, тэргүүлэгч нартай зөвшилцсөний дагуу нэмсэн гэв.

6. Сургалтын төлбөр нэмэгдсэнээр сургуулийн орчин нөхцөл хэрхэн сайжирсан бэ?

-Үүнд ихэнх сургууль манайх сүүлийн хоёроос гурван жил төлбөрөө нэмээгүй гэсэн хэдхэн тойм үгээр хариулсан.

7. Оюутны сургалтын төлбөрийг хувааж төлөх боломжтой юу?

-Мөн л ихэнх их дээд сургуулиуд боломжтой гэсэн товч хариу өгөв.

Их, дээд сургуулиудын албан бичгийн хариу нь үнэнтэй нийцэхгүй байгаа тул Ардчилсан Оюутны Холбоо, Их дээд сургуулийн холбоонууд нэгдэж энэ сарын 31 нд "Сургалтын төлбөрийг бууруулахыг шаардсан" тайван жагсаал хийхээ мэдэгдсэн юм.