Э.Энхриймаа “Монголын сайхан бүсгүй”-гээр шалгарлаа

2018/07/02

Монголд анх удаа сайхан бүсгүйн уралдааныг зохион байгуулж эхэлснээс хойш 29 жилийн дараа, 30 жилийн ойн босгон дээр Монголын эмэгтэйчүүдийн “Хатан эрдэнэ” холбооноос зохион байгуулдаг 15 дахь удаагийн уралдаан “Монголын сайхан бүсгүй-2018” уралдааныг өнгөрөгч бямба гаригт Зайсан хилл цогцолборт зохион байгууллаа. Энэ удаагийн уралдаан хамгийн сүүлд 2007 онд “Монголын сайхан бүсгүй” уралдааныг зохион байгуулснаас хойш 11 жилийн дараа дахин зохион байгуулснаараа онцлог байв.

Үе үеийн сайхан бүсгүйчүүд нэгдэн зохион байгуулсан тус уралдаан “Эмэгтэйчүүд гар гараасаа” уриатай, нийгэмд зөв бодол, зөв үг, зөв үйлдэл, зөв хандлагыг бий болгох зорилготой байв. Ижил төрлийн бусад тэмцээнээс ялгаатай нь модель, загвар өмсөгч мисс биш харин оюунлаг, хүмүүнлэг, авьяаслаг, жинхэнэ сайхан бүсгүйг тодруулахад энэ наадмын зорилго чиглэснийг зохион байгуулагчид нь өмнө мэдээлсэн. Тиймээс АНУ тэргүүтэй дэлхийн бусад улс орны жишгийг дагаж “бикини” буюу усны хувцастай гарааг бүрэн халж, анх удаа “ажил мэргэжлийн” гарааг бий болгон, оюунлаг бөгөөд хүмүүнлэг чанарыг чухалчилжээ.

Төгсгөлийн шатанд шалгарсан 18 оролцогчийн хувьд 19-27 насны, мэргэжлийн дуучин, балетчин, мөн эмч, багш, хуульч, эрх зүйч, нягтлан бодогч, архитектор гээд төрөл бүрийн салбарт хүч үзэхээр бэлтгэгдэж буй оюутан бүсгүйчүүд. Монголын сор болсон зуу гаруй сайхан бүсгүйчүүдээс шалгарч, эцсийн шатанд үлдсэн 18 бүсгүй энэ өдөр үндэсний хувцас, ажил мэргэжлийн хувцас, гоёлын даашинзтай үзүүлбэр толилуулсан. Олон улсын жишгээр хүмүүнлэг, оюунлаг, авьяаслаг сайхан бүсгүйчүүдийн шалгаруулалт тайзнаас гадуур болж, ялагчид нь тодорсон байсныг мөн энэ өдөр үзэгчдэд зарлан сонордуулав.

11 жилийн дараа эргэж ирсэн “Монголын сайхан бүсгүй-2018” наадмын ялагчаар Эрдэнэбаатарын ЭНХРИЙМАА шалгарч, 999 сорьцтой мөнгөн титэм, 20 сая төгрөгийн мөнгөн шагналын эзэн болов.

Э.Энхриймаа энэ жил 21 настай, Орхон аймгийн оролцогч, биеийн өндөр 174 см, биеийн жин 53 кг. Санхүү, эдийн засгийн дээд сургуульд Олон улсын нягтлан бодогч мэргэжлээр суралцдаг, унаган англи, орос хэлтэй. Оюунлаг сайхан бүсгүй шалгаруулах тэмцээнд Э.Энхриймаагийн тавьсан илтгэл шүүгчдээс хамгийн өндөр үнэлгээ авсан бөгөөд "Монголын сайхан бүсгүй"-гээр тодроход тэрхүү шалгаруулалтын оноо ихээхэн хувь нэмэр оруулсан байна.

“МОНГОЛЫН САЙХАН БҮСГҮЙ-2018” УРАЛДААНЫ ЕСӨН ЭРДЭНИЙН ӨРГӨМЖЛӨЛТ БҮСГҮЙЧҮҮД:

Алтан эрдэнэ: Э.Энхриймаа

Мөнгөн эрдэнэ: М.Цэвэлмаа

Зэс эрдэнэ: Э.Туул

Шүр эрдэнэ: Амарзаяа

Сувд эрдэнэ: О.Уярал

Оюу эрдэнэ: О.Олонбаяр

Номин эрдэнэ: М.Ариунжаргал

Тана эрдэнэ: Н.Тунгалагням

Ган эрдэнэ: Н.Бадмаараг

ТУСГАЙ ШАГНАЛ

Авьяаслаг сайхан бүсгүй: О.Олонбаяр