Үндэсний их баяр наадмаар Төв цэнгэлдэх хүрээлэн болон Хүй долоо худагт наадамчин олонд эрүүл ахуй, хүнсний аюулгүй байдал, стандартын шаардлага хангасан чанартай, соёлтой үйлчилгээ үзүүлэх ажлыг зохион байгуулах, хяналт тавих, холбогдох хууль тогтоомжийн хэрэгжилтийг хангах зорилгоор Улаанбаатар хотын Ерөнхий менежерийн А/54 тоот тушаалаар Үндэсний их баяр наадмын үеэр худалдаа, үйлчилгээ зохион байгуулах, хяналт тавих тухай удирдамжийг баталсан билээ. Үүнтэй холбогдуулан Улаанбаатар хотын Захирагчийн ажлын алба болон Нийслэлийн мэргэжлийн хяналтын газраас мэдээлэл хийлээ. 

Энэ жилийн баяр, наадмаар Хүй долоо худаг, Төв цэнгэлдэх хүрээлэнд нийт 610 иргэн, аж ахуйн нэгжид худалдаа, үйлчилгээ явуулах зөвшөөрөл олгох аж. Өөрөөр хэлбэл, Хүй долоо худагт 210 цэг, Төв цэнгэлдэх хүрээлэнд 400 цэгт зөвшөөрөл олгохоор төлөвлөжээ. Харин баярын өдрүүдэд 400 гаруй улсын байцаагч, хоёр лаборатори ажиллах юм байна.

Энэ талаар Нийслэлийн мэргэжлийн хяналтын газраас мэдээлэхдээ "Нийслэлийн мэргэжлийн хяналтын газраас хяналт шалгалт хийнэ. Энэ жилийн наадмаар Хүй долоо худагт 210, Төв цэнгэлдэх хүрээлэнд 400 цэгт зөвшөөрөл олгоно. Нийт 400 гаруй улсын байцаагч ажиллана. Хоёр лаборатори ажиллана. Мах, айргаас дээж авч шалгалт хийнэ. Нийт 610 аж ахуйн нэгжийг сонгон шалгаруулалт зарлаж, материалыг нь хүлээж авсан. Өнгөрсөн онтой харьцуулахад энэ жил 100 орчим цэгээр бууруулж зөвшөөрөл олгож байна. Шалтгаан нь, зай талбай бага. Дээр нь иргэдийн эрүүл мэндийг бодож аж ахуйн нэгжүүдэд зөвшөөрөл түлхүү олгож байна" гэлээ. 

Хүй долоо худагт таван худаг байдаг. Мэргэжлийн хяналтын газраас дээрх худгаас шинжилгээ авчээ. Зөвхөн хоол, хүнсний эрүүл ахуйд улсын байцаагч хяналт тавихаас гадна дэд бүтцийн байцаагчид ч ажиллах аж. Түүнчлэн Сүхбаатарын талбай, Үндэсний цэцэрлэгт хүрээлэн зэрэг таван цэгт улсын байцаагч нар ажиллахаар болжээ.

Наадмын талбайд худалдаа үйлчилгээ эрхлэх үйлчилгээний ажилчдын ажлын хувцасны загварыг баталсан байна. Тухайлбал, Хүй долоо худагт наадмын лого бүхий ногоон өнгийн саравчтай малгай, цагаан цамц өмсөх бол Төв цэнгэлдэх хүрээлэнд улаан өнгийн малгай, цагаан цамцаар жигдрэх аж. Харин Хүй долоо худгийн соёл, урлагийн талбайд гар урлал, бэлэг дурсгал, соёлын барааны худалдааны 50 цэг, хөдөлгөөнт тоглоомын 40 цэг, кофе шопын таван цэгт зөвшөөрөл олгох юм байна. Сонгон шалгаруулалтыг мэргэжлийн байгууллагууд явуулж шалгарсан аж ахуйн нэгжүүдийн нэрсийн жагсаалтыг ирэх долдугаар сарын 2-нд олон нийтэд мэдээлэхээр төлөвлөжээ.