Ойрын өдрүүдийн цаг агаарын төлөв болон үер уснаас сэргийлэх талаар ОБЕГ-ын Цаг уурын асуудал хариуцсан мэргэжилтэн, хошууч Ч. Туяагаас тодрууллаа.

-Голуудын усны түвшин ямар байгаа вэ. Одоогийн байдлаар үерлэсэн гол хэр олон байна вэ?

-Он гарсаар усархаг бороо орж, хэд хэдэн газар үер буусан. Ялангуяа, зуншлага тааруу байгаа энэ үед уулын үер буух эрсдэлтэй байна. Хөрс хуурайшиж, хатсанаар үер хүчтэй буух нөхцөл бүрддэг. Цаг уурын байгууллагаас ирүүлсэн мэдээллээр Увс, Баян-Өлгий аймаг буюу Ховд гол нэлээдгүй үерлэсэн байна.

Мөн гол үерлэсэн үед иргэд сэрүүцэх, амарч зугаалахаар яваад амь насаа алдсан тохиолдол цөөнгүй бүртгэгдэж байна. Түүнчлэн голын эрэг дагаж буусан айлуудыг нүүлгэж шилжүүлэх шаардлага гарч байна. Хөдөө орон нутгаар бороо үргэлжлэн орж байгаа эдгээр өдрүүдэд томоохон голын түвшин нэмэгдэж байна.

-Амралт зугаалгын улирал эхэлсэнтэй холбогдуулан иргэдийн аюулгүй байдлыг хэрхэн хангаж ажиллаж байна вэ. Гол усны дуудлага өмнөх жилүүдийнхээс цөөрсөн үү?

-Үерийн аюулаас гадна усны осол их гарч байна. Он гарсаар 12 аймгийн 20 сум, нийслэлийн гурван дүүрэгт 27 удаа усны осол гарч, 35 хүн амь насаа алдсаны найм нь бага насны хүүхэд байна. Эцэг эхчүүдийн хайхрамж болгоомжгүйгээс бага насны хүүхэд хохирохоос гадна амь насаа алдсан иргэдийн 87 хувь нь эрэгтэйчүүд байгаа нь согтууруулах ундаа хэрэглэсэн үедээ осолдох тохиолдол багагүй бүртгэгдэж байна.

Мөн амралт эхэлсэнтэй холбогдуулан өсвөр насны хүүхдүүд нийлж зугаалгад явж тогтоол усанд унах, сэлж байгаад эрсдэх тохиолдол цөөнгүй гарч байна. Үүнтэй холбоотойгоор онцгой байдлын байгууллагаас сургалт зөвлөгөө өгч, төв суурин газруудаар тогтмол эргүүл гаргаж байна. Иргэд бороотой, гол мөрний усны түвшин нэмэгдсэн үед гүүр, гарам, гарцтай газраар автомашинтай зорчих, хүүхдийг гол усны эрэг дагуу явуулж, тоглуулахгүй байх, хүүхдэд тавих хараа, хяналтаа сайжруулах шаардлагатай байна.

Эх сурвалж: ЗУУНЫ МЭДЭЭ