Америкт 1921 онд анх удаа үндэстний хэмжээний сайхан бүсгүй шалгаруулах Miss America уралдааныг зохион байгуулахад УСНЫ ХУВЦАСТАЙ ЗАЛУУ ХАТАГТАЙ НАРЫН ПАРАД эмэгтэй хүний гоо үзэсгэлэн, эрхэмсэг нандин байдлыг тодотгон харуулахаас илүү олон нийт, жуулчдын анхаарлыг татах гэсэн маркетингийн ач холбогдолтой байсан гэдэг.

Дэлхий хувьсан өөрчлөгдөж буйн жишгээр эмэгтэй хүнийг харах, ойлгох, мэдрэх, хүндэтгэх үзэл ч өөрчлөгдөж байгаа. Бүсгүй хүнийг үргэлж эр хүнээс доод гаралтай гэж үздэг хуучинсаг үзэлтэй, шашны өндөр нөлөөтэй улсууд ч эмэгтэй хүний эрхийг хангах чиглэлд тодорхой бодлого баримталж, арга хэмжээ авч эхэлсэн өнөө цагт Miss America уралдааныг зохион байгуулагчид нэгэн чухал шийдвэр гаргаснаа танилцуулсан юм. Холливудын дэлгэцний цаадах бохир үнэнийг илчилсэн #MeToo аян Америк төдийгүй дэлхий нийтэд эмэгтэй хүний эрхийг хүндэтгэх, бэлгийн хүчирхийлэл, дарамтаас хамгаалах талаар дорвитой нөлөө үзүүлж чадсан. Үүнийг дагаад АНУ-ын сайхан бүсгүй шалгаруулах уралдааныг зохион байгуулагч Miss America Organization усны хувцастай гарааг тэмцээний хөтөлбөрөөс бүрмөсөн хасах шийдвэр гаргасан юм.

Тус байгууллагын ивээн тэтгэгчдийн зөвлөлийн тэргүүн, Америкийн миссээр шалгарч байсан Гретчен Карлсон зургадугаар сарын 5-нд Америкийн хамгийн олон үзэгчтэй өглөөний хөтөлбөр болох ABC сувгийн “Good Morning America” шоунд оролцож, дээрх шийдвэрийг албан ёсоор танилцуулсан. Ингэхдээ тэрбээр:

“Бид бүсгүйчүүдийг харагдах байдлаар нь бус, харин тэдний дотор юу оршиж, юу тэднийг бие хүн болгож байгаагаар нь шүүх болно. Усны хувцас өмсөөд, өндөр өсгийт дээр алхахыг бид хүсэхгүй” хэмээсэн юм.

Хэдэн арван жилийн турш эмэгтэйчүүдийн эрхийг хамгаалах олон байгууллага, газрууд гоо бүсгүй, миссийн тэмцээний усны хувцастай гарааг шүүмжилсээр ирсэн. Усны хувцастай тайзан дээр гарсныхаа төлөө галбиргүй, мяраалгаараа дуудуулж, шүүмжлэлийн бай болсон бүсгүйчүүд цөөнгүй бий. Үлдсэн амьдралынхаа туршид хүссэн хоолоо ч идэж чадахгүй мөнхийн хоолны дэглэм барих сэтгэцийн эмгэгтэй болсон гашуун түүх ч бий.

Гоо бүсгүй шалгаруулах уралдаан бол зүгээр ч нэг соёлын арга хэмжээ биш. Одоо бол дэлхий нийтэд хүлээн зөвшөөрөгдсөн томоохон үйл явдал гэж зүй ёсоор үнэлэгдэх болсон. Miss World буюу Дэлхийн гоо бүсгүй шалгаруулах тэмцээний шууд дамжуулалт үзэгчдийн тоогоор хөлбөмбөгийн Дэлхийн аварга шалгаруулах тэмцээн болоод зуны олимпийн наадмын дараа бичигддэг. Үнэхээр л эмэгтэй хүн хэзээд мөнхийн сэдэв байсаар ирсэн. Тэр чинээгээрээ гоо бүсгүй шалгаруулах тэмцээн дэлхий нийтийн анхаарлыг татсаар ирсэн.

Сонирхуулахад, зургадугаар сарын 30-нд Монголын эмэгтэйчүүдийн Хатан эрдэнэ холбооноос Монголын сайхан бүсгүй шалгаруулах 15 дахь удаагийн гоо сайхны наадмыг зохион байгуулах гэж байгаа. Эл наадмыг зохион байгуулагчид ч мөн нийгмийн чиг хандлага, эмэгтэйчүүдийн эрх, гоо сайхныг дээдлэх хандлагыг дэмжиж, улсын чанартай энэхүү гол уралдаанаасаа усны хувцастай үзүүлбэрийг хассанаа албан ёсоор мэдэгдсэн. “Монголын сайхан бүсгүй-2018” гоо сайхны тэргүүн наадам энэ сарын 30-нд болно. 

Үндэсний шуудан сонин