79-р сургуулийн захирлыг албан тушаалаас нь чөлөөлжээ. Сургуулийн захирал Ш.Болор-Эрдэнийг “Хөдөлмөрийн гэрээнд заасан үүргээ биелүүлээгүй, ажлын хариуцлага алдаж, сургуулийн орчны аюулгүй байдлыг хангах нөхцлийг бүрдүүлээгүй ноцтой зөрчил гаргасан” гэж дүгнэсэн байна.

Сургуулийн хөлбөмбөгийн талбай дээр дээр тоглож байсан 11 настай хүү хөлбөмбөгийн хаалганы хөндлөвч төмөрт даруулан амиа алдсаны дараа Боловсролын сайд Ц.Цогзолмаа амиа алдсан хүүгийн ар гэрийнхэнд эмгэнэл илэрхийлэн уучлал хүсээд “сургуулийн захиралд арга хэмжээ авна” гэж мэдэгдсэн. Арга хэмжээг нь ч авсан байна. Тэглээ гээд нас барсан хүү эргээд ирэхгүй нь харамсалтай. Гэвч ямар ч муу муухай зүйлээс авах ёстой сургамж байдаг.

Хэдэн жилийн өмнө Тэнгис кинотеатрын хажууд “Эко консрташн”-ы барьж байсан барилгаас барилгын төмөр унаж, дэргэдүүр нь өнгөрч 21 настай залуугийн амийг авч одсон. Тэр үед ч гэсэн нийтээрээ шахаж шаардаж байж мэргэжлийн хяналтынхныг хөдөлгөн барилгын талбайд байнга гардаг осол эндэгдлийг бага ч гэсэн бууруулж чадсан билээ. Одоо ч гэсэн Боловсролын яамны нөхөд үүссэн нөхцөл байдлыг ашиглаад сургууль болгоны спортын талбай, хүүхдийн цэцэрлэгүүдийн тогтоомын талбайд цаг алдалгүй хяналт шалгалт хийлгэх хэрэгтэй. Дахиад ийм осол эндэл гаргахгүйн тулд. Тэрнээс илүү боловсон хүчнийхээ бодлогыг эргэж харах, сургуулийн захирлуудаа шилж сонгох ёстой. Нэг үхрийн эвэр доргиход мянган үхрийн эвэр доргидог гэж үг бий.

УИХ-ын гишүүн Х.Нямбаатар энэ хавар Боловсролын тухай хуульд нэмэлт өөрчлөлт оруулахаар хуулийн төсөл өргөн барьсан нь одоо УИХ-ын хэлэлцүүлэгт ороод явж байна. Хуулийн төслийн гол агуулга нь сургууль, цэцэрлэгийн захирлуудын томилгоог шат шатны Засаг дарга нарын эрх мэдэлд өгөхөөр тусгасан байна лээ. (Одоогийн хуулиар орон нутагт аймгийн Засаг дарга нар, нийслэлд Нийслэлийн боловсролын газар томилгоо хийж байгаа) Нийслэлд дүүргүүдийн, орон нутагт аймаг, сумдын Засаг дарга нар хүнээ томилно гэсэн үг.

Цаад шалтгаан нь сургуулиудад нийлүүлдэг “Үдийн цай” хөтөлбөр, төсвийн бусад санхүүжилттэй холбоотой зүйл л яригддаг. Төрийн өмчийн цэцэрлэг, сургуулиудад нэг хүүхэд авахад сая төгрөгийн хахууль (харьяаллын бус гэдэг шалтгаанаар) өгдөг гэлцэх юм билээ. Намрын намарт л босч ирдэг яриа. Энэ дайны эрх мэдэлтэй, орлоготой байхад дунд сургуулийн захирал ч гэсэн “ашигтай мест” болж харагдаж байна. Тэгээд ялсан нам нь засгаа аваад, сургуулийн захирлаа ч гэсэн томилоод эхэлбэл боловсролын салбар тэр чигээрээ нурж унах нь тодорхой.

Үүн дунд л хүүхдийн эрх ашиг хохирч, хог дээр хаягдаж, адаг сүүлдээ амь насны асуудалд хүрч байгаа юм шүү дээ. Гэтэл салбарын яам нь хүртэл тэдэнд гар хүрэх эрхгүй. Яагаад гэвэл Нийслэлийн боловсролын газар захирлуудын томилгоог хийдэг, яамны сайд бол дэргэд нь “чукча”. Одоо бүр Нийслэлийн боловсролын газар ч биш, сум, дүүргийн Засаг дарга нар сургуулиудын захирлыг томилох тухай УИХ дээр ярьж эхэлж байна. Сонгуулийн үр дүнд улс төрийн томилгоогоор гарч ирсэн нэг Засаг даргад ямар юмных нь сургууль, боловсролын стандарт. “Түй” ч хамаа байхгүй. Үсрээд “Сонгуулиар манай намыг дэмжих үү?” л гэж асууна биз. Нөгөө 60 тэрбумын схем чинь энэ хүртэл явна гэсэн үг. Бараг явчихсан ч байх.

Тийм болохоор нэгэнт эхэлсэн яриаг нэг сургуулийн захирал сольсон төдийгөөр дуусгамааргүй байна. Доор ажил хариуцаж байгаа хүмүүсийн үзэл, хандлага ийм байхад дээр салбарын яам хичнээн бодлого яриад, мянга дэвхцээд яах юм. Ямар ч мундаг бодлого боловсруулаад, хөтөлбөр батлаад нэмэргүй. Ажил хариуцаж байгаа хүмүүсийн чадвар чансаа, санал санаачилга, сэтгэл зүтгэл хамгийн чухал. Ялангуяа боловсролын салбарт.

Тиймээс У.Хүрэлсүх Ерөнхий сайд сургуулийн барилгын онгорхой цоорхой бөглөж явахын оронд боловсролын бодлогоо түрдэг, салбарын сайд нь боловсон хүчнээ мэддэг болох хэрэгтэй байна. Өнөөдөр нийгмийн сүлжээнд “Дахиад нэг ч хүүхэд тоглодог газраа эрсдэлд орохгүй байх талаар БҮГДЭЭРЭЭ шаардлага, хяналт, санаа тавицгаая. Жижигхэн зүрхнүүдээс хүүхэд нас, хүсэл мөрөөдлийг нь булаах бүх зүйлийн эсрэг зогсоцгооё!” аян өрнөөд эхэлчихсэн байна. Энэ л манай боловсролын салбарт авч явах ёстой бодлого юм даа.

Б.СЭМҮҮН