Нийслэлийн аялал жуулчлалын газраас гадаад, дотоодын жуулчдад зориулж, Улаанбаатар хоттой танилцах  “Сити тур” төслийг хэрэгжүүлж эхэллээ. Энэ төсөл жуулчны улиралд буюу зургадугаар сарын 18-аас аравдугаар сарын 31 хүртэл үргэлжлэх юм байна.

Одоогоор хоёр автобус үйлчилгээнд гарсны нэг нь хот дотор өдөр бүр, нөгөө нь Цонжин болдог руу долоо хоногт гурван удаа (Мягмар, Лхагва, Бямба гаригуудад) явж байгаа аж. Хот доторх аяллын маршрутад түүхэн дурсгалт газрууд болон музей үзэх зэрэг хөтөлбөр багтаж байна. Хотын аяллын маршрутыг сонирхвол, Сүхбаатарын талбай-Үлэг гүрвэлийн музей-Гандантэгчилэн хийд-Говь кашмерын нэрийн дэлгүүр-Зайсан толгой-Богд хааны ордон музей-Чойжин ламын музей гэсэн чиглэлээр жуулчдад үйлчилдэг гэв.

Харин хот орчмын аяллын маршрут нь Сүхбаатарын талбай-Улаанбаатар үсгэн хөшөө-Богд хааны ордон музей-Зайсан толгой-Цонжин болдог-Чойжин ламын музей гэсэн дурсгалт газруудаар тус бүр аялуулах аж. Одоогоор жуулчид цөөн байгаа ч Нийслэлийн аялал жуулчлалын газар нь аяллын компаниудтай харилцаа холбоотой ажиллаж, мөн гадаадад энэхүү үйлчилгээгээ цахимаар дамжуулан сурталчилж чадвал хамгийн бага зардлаар Улаанбаатар хоттой танилцах боломжийг жуулчдад олгох юм. Зөвхөн гадаадын жуулчид гэлтгүй дотоодын жуулчдаа татахын тулд сургууль, байгууллагуудтай хамтран ажиллах юм байна. 

Б.ТУЯА