Хөдөлмөр, нийгмийн хамгааллын яамны байрны гадаа эмч, сувилагч нар суулт хийж байна. Тэд Засгийн газар “Хөдөлмөр, нийгмийн зөвшлийн гурван талт 2017-2018 оны улсын хэлэлцээрийн 3.2 дах заалт, нэмэлт хэлэлцээрийн 1, 3, 5, 7, 8 дах заалтуудыг өнөөдрийг хүртэл хэрэгжүүлэхгүй үл тоож байна” гэж үзэн салбарын сайд С.Чинзоригийг огцрохыг шаардаж, Ерөнхий сайд У.Хүрэлсүхэд шаардлага хүргүүлэхээр болжээ. 

Одоогоос сар гаруйн өмнө эрүүл мэндийн салбарынхан цалингаа нэмүүлэх шаардлага тавин Сүхбаатарын талбайд суулт зарлаж, үсээ хусч байсан билээ. Тэр үед Ерөнхий сайд У.Хүрэлсүх суугчдыг хүлээн авч уулзсан ч тэдний шаардлага одоо хүртэл биелээгүй байгаа тул эрүүл мэндийн салбарынхан эрх ашгаа хамгаалахын тулд улс төрийн тэмцлийн хэлбэрт шилжиж байгаа бололтой.

Монгол Улсын хэмжээнд 40 гаруй мянган эмч, эмнэлгийн ажилчин байдгаас 12000 нь 26 төрлөөр мэргэшсэн сувилагч, сувилахуйн ухааны мэргэжилтнүүд байна. Тэдгээрийн 97 хувь нь эмэгтэй, дундаж цалин 400-500 мянган  төгрөг байдаг. Тиймээс сувилагчдын цалинг ажлын байран дахь бүтээмж нөхцөлтөй нь уялдуулан 7-49 хүртэл хувиар нэмэгдүүлэх шаардлагатай гэдгийг Эрүүл мэндийн сайд Д.Сарангэрэл хэлж байсан.  Ингэхийн тулд эрүүл мэндийн салбарт жилд 73 тэрбум төгрөгийн нэмэлт санхүүжилт шаардлагатай юм байна.

Б.ГАЛ