“Хатан эрдэнэ” холбооноос зохион байгуулдаг “Монголын сайхан бүсгүй” тэмцээн 11 жилийн дараа дахин зохион байгуулагдаж байна. Энэ сарын 30-ны өдөр “Зайсан хилл” цогцолборт болох финалын шалгаруулалтад 20 гоо бүсгүй өрсөлдөж 15 дахь удаагийн “Монголын сайхан бүсгүй” мөнгөн эрдэнийн титэм гардаж авах юм. Шагналын нийт сан 150 сая төгрөг байх бөгөөд шагналын тодорхой хувийг хүмүүнлэгийн үйлсэд зориулах гэнэ.

“Хатан эрдэнэ” холбоо 1989 оноос 2007 он хүртэл 14 гоо бүсгүйг “Монголын сайхан бүсгүй”-гээр өргөмжлөөд байгаа. Анхны миссээр Улаанбаатар хотын оролцогч Г.Биндэрьяа, хамгийн сүүлд 2007 онд Орхон аймгийн оролцогч Г.Гантуяа нар “Монголын сайхан бүсгүй”-гээр шалгарч байв. Түүнээс хойш арав гаруй жил уг тэмцээнийг завсарласан шалтгаанаа “Миссийн тэмцээн олширч нэр хүнд буурснаас тэмцээнийг түр хугацаанд завсарлахад хүрсэн” хэмээн тайлбарлав.

Харин энэ удаагийн тэмцээнийг “Монголын сайхан бүсгүй”-гээр шалгарч, миссийн титэм гардсан ороцлогчид өөрсдөө шүүн явуулж байгаа юм байна. Өмнөх удаагийн тэмцээнүүдээс ялгаатай нь сайхан бүсгүйчүүчийн өрсөлдөөнөөс “бекини” буюу усны хувцастай үзүүлбэрийг хасчээ. Дэлхий нийтийн жишиг ч бас “Гоо сайхан зөвхөн гадна үзэмжид байдаггүй” хэмээн үзэж бүсгүйчүүдээ нүцгэлэхээс татгалзаж эхэлсэн байна. 2018 оны “Америкийн гоо бүсгүй” тэмцээн ч бас усны хувцастай үзүүлбэрийг хасчээ. Тиймээс “Хатан эрдэнэ” холбоо энэ удаагийн тэмцээндээ усны хувцастай үзүүлбэрийн оронд “Гоо бүсгүйн үзүүлбэр”-ийг оруулсан байна. Энэ нь ямар үзүүлбэр вэ гэдгийг “Зайсан хилл” цогцолборт болох финалын шалгаруулалтад очиж байж л мэдэх юм.

Мөн тэмцээнийг олон нийтэд ил тод явуулахын тулд “Хатан-Эрдэнэ” холбоо өөрсдийн пэйж хуудсаар дамжуулан санал авах бөгөөд онлайнаар явуулсан санал асуулгын дүн шалгаруулалтын нийт 100 онооны таван хувийг бүрдүүлэх гэнэ.

Үе үеийн сайхан бүсгүйчүүдийг эргэн саная. Магадгүй, зураг үзэнгээ тэдний титэмний аль загвар нь танд таалагдаж байгааг харьцуулж болох юм. 

• Анхны уралдааны тэргүүн байрын эзэн
• "Алтан эрдэнэ"-ийн өргөмжлөлт
• Анагаах ухааны дунд сургуулийг эм зүйч, гоо сайханч мэргэжлээр төгссөн 
• Улаанбаатар хотын оролцогч Г.Биндэръяа

• "Монголын сайхан бүсгүй 1990" уралдааны тэргүүн мисс
• "Алтан эрдэнэ"-ийн өргөмжлөлт 
• Монгол туургатны оюутны анхдугаар уралдааны тэргүүн мисс
• Гадаад хэлний дээд сургуулийг англи, орос хэлний орчуулагч мэргэжлээр төгссөн
• "Их Монгол язгууртан” ТББ-ын гишүүн
• Монголын сүмо бөхийн холбооны удирдах зөвлөлийн гишүүн
• Улаанбаатар хотын оролцогч Н.Мөнхцэцэг

• "Монголын сайхан бүсгүй 1991" уралдааны тэргүүн мисс
• "Алтан эрдэнэ"-ийн өргөмжлөлт 
• МУИС-ийн Олон улсын харилцааны сургуулийг франц хэл судлал мэргэжлээр төгссөн
• ШУТИС-ийн КТМС-д удирдлагын менежментийн магистр хамгаалсан
• Үндэсний хөрөнгө оруулалтын банкны ТУЗ-ийн гишүүн
• Улаанбаатар хотын оролцогч Ч.Мичидмаа

• "Монголын сайхан бүсгүй 1992" уралдааны тэргүүн мисс
• "Алтан эрдэнэ"-ийн өргөмжлөлт 
• Улаанбаатар хотын оролцогч Ч.Чулуун-Эрдэнэ агсан

• "Монголын сайхан бүсгүй 1993" уралдааны тэргүүн мисс
• "Алтан эрдэнэ"-ийн өргөмжлөлт 
• Дархан-Уул аймгийн оролцогч Ц.Сарантуяа

• "Монголын сайхан бүсгүй 1994" уралдааны тэргүүн мисс
• "Алтан эрдэнэ"-ийн өргөмжлөлт 
• Гадаад харилцааны яамны Герман улсыг хариуцсан соёлын атташе
• Дархан-Уул аймгийн оролцогч О.Оюунтуяа

• "Монголын сайхан бүсгүй 1995" уралдааны тэргүүн мисс
• "Алтан эрдэнэ"-ийн өргөмжлөлт 
• Эдийн засгийн их сургуулийг эдийн засагч мэргэжлээр төгссөн
• Дархан-Уул аймгийн оролцогч С.Бүрэнжаргал

• "Монголын сайхан бүсгүй 1997" уралдааны тэргүүн мисс
• "Алтан эрдэнэ"-ийн өргөмжлөлт
• СЭЗДС-ийг нягтлан бодогч мэргэжлээр төгссөн
• Германд эмчилгээний гоо сайхны чиглэлээр суралцаж, өдгөө энэ чиглэлээрээ  ажиллаж байгаа
• Улаанбаатар хотын оролцогч Б.Түмэнхүслэн

• "Монголын сайхан бүсгүй 1999" уралдааны тэргүүн мисс
• "Алтан эрдэнэ"-ийн өргөмжлөлт 
• Тайванийн их сургуулийг интерьер, дизайнер мэргэжлээр төгссөн
• АНУ-д мэргэжил дээшлүүлсэн
• Өдгөө АНУ-д өөрийн үүсгэн байгуулсан интерьер, дизайны компанийн захирлаар ажилладаг.
• Улаанбаатар хотын оролцогч Ц.Сансармаа

• "Монголын сайхан бүсгүй 2001" уралдааны тэргүүн мисс
• "Алтан эрдэнэ"-ийн өргөмжлөлт 
• Хүмүүнлэгийн ухааны их сургуулийн сэтгүүл зүйн ангийг төгссөн
• БНХАУ-ын Нанжин хотын их сургуульд сэтгүүл зүйн магистр хамгаалсан
• Гадаад харилцааны яамны Дипломат байгууллагуудын үйлчилгээний газрын дарга
• Завхан аймгийн оролцогч Ё.Нямжав

• "Монголын сайхан бүсгүй 2002" уралдааны тэргүүн мисс
• "Алтан эрдэнэ"-ийн өргөмжлөлт 
• ОУЭЗБ-ийн дээд сургуулийг Банк санхүү, нягтлан бодогч мэргэжлээр төгссөн
• МУИС-ийн ОУ-ын харилцааны сургуульд ОУ-ын эдийн засагч мэргэжлээр магистр хамгаалсан
• "Лежендари Феникс” ХХК-ийн Ерөнхий захирал
• "Сүү” ХХК-ийн ТУЗ-ийн гишүүн
• “Оюуны цацал” ТББ-ын тэргүүн
• Монголын эмэгтэйчүүдийн Хатан эрдэнэ холбооны дэд ерөнхийлөгч
• Увс аймгийн оролцогч Д.Уянгалянхуа

• "Монголын сайхан бүсгүй 2003" уралдааны тэргүүн мисс
• "Алтан эрдэнэ"-ийн өргөмжлөлт 
• БНСУ-ын Хэл шинжлэлийн их сургуулийг төгссөн
• Улаанбаатар хотын оролцогч П.Ариунбилэг

• "Монголын сайхан бүсгүй 2004" уралдааны тэргүүн мисс
• "Алтан эрдэнэ"-ийн өргөмжлөлт 
• АНУ-д Бэркэли их сургууль төгссөн
• Булган аймгийн оролцогч А.Сарнай

• "Монголын сайхан бүсгүй 2007" уралдааны тэргүүн мисс
• "Алтан эрдэнэ"-ийн өргөмжлөлт
• БНСУ-д "Онгоцны багийн гишүүн"-ээр суралцаж, Өмнөд Солонгосын "Korean Air" компанид ажиллаж байсан
• ШУТИС-ийн КТМС-д Бизнес удирдлагын бакалавр хамгаалсан
• Сингапур дахь Европын холбооны их сургуульд Бизнес удирдлагын магист хамгаалсан
• "Нарны хүүхдүүд" асрамжийн төвийн хүндэт иргэн
• 2007 оноос хойш хүмүүнлэг, сайн үйлсийн аянд тасралтгүй оролцож буй "Гэгээн цацал" ТББ-ыг үндэслэгч 
• "Альфа Азиа" ХХК-ийн Ерөнхий захирал
• Орхон аймгийн оролцогч  Г.Гантуяа

Б.ЗАЯА