Хүй долоон худаг орчмын бэлчээрийг хамгаалах, уяач хүүхдүүд болон наадамчдын аюулгүй байдлыг хангах зорилготой “Монгол наадам цогцолбор”, Монголын морин спорт, уяачдын холбоо (ММСУХ) хамтран ажиллах Санамж бичиг байгуулжээ. Санамж бичгийн хүрээнд Хүй долоон худагт уламжлалт болон сонгомол морин уралдааныг хөгжүүлэх, морин тойруулгын ажиллагааг явуулахад хамтран ажиллах юм.

Гарын үсэг зурах ёслолын үеэр “Монгол наадам цогцолбор”-ын дарга Н.Батсүмбэрэл “Морин тойруулгын ажлыг энэ онд багтаан эхлэх, цаашлаад хурдан морины замын дагуу засмал зам тавих бөгөөд замын ажлыг төр, хувийн хэвшлийн түншлэлийн хүрээнд хийх боломжтой.
Үндэсний их баяр наадмын үеэр хурдан морьдын уралдааныг засмал замаар дагахаас гадна холын зайн гүйлтийн тэмцээн зэрэг олон төрлөөр ашиглах юм” гэв.

Мөн ММСУХ-ны ерөнхийлөгч М.Мөнхбаясгалан “Унаач хүүхдүүдийн аюулгүй байдлыг хангах үүднээс зам засах, усалгаа хийхээс гадна унаач хүүхдэд стандарт хувцас өмсүүлж хэвших чиглэлд Гэр бүл хүүхэд залуучуудын хөгжлийн газартай хамтран ажиллаж байна” гэлээ. Энэ жил нил хуурайшилттай  байгаа учир Үндэсний их баяр наадмын үеэр үүлэнд зориудаар нөлөөлж, бороо оруулах асуудлаар холбогдох газруудад санал өгснөө дуулгав.

Хурдан морьдын уралдааны зам насны ангиллаас хамаарч 10-26 км байдаг. Одоогийн ханшаар нэг км засмал замын өртөг нэг тэрбум төгрөг гэж тооцвол хурдан морьдыг машинаар дагахын тулд наад тал нь 26 тэрбум төгрөг шаардлагдах бололтой. Харин олон нийт энэ шийдвэрийг хэрхэн хүлээж авч байгааг жиргээчдээс харж болох юм.