“Монголын Зэс Корпораци” нь 2017 оноос эхлэн жил бүр Эрдэнэтийн ирээдүй болсон сурагч хүүхдүүдэд чиглэсэн олон арга хэмжээ зохион байгуулж ирсэн. Түүний нэг нь жил бүрийн хичээлийн жилийн нээлтийг угтан сурагчдад хичээлийн хэрэгсэл бэлэглэдэг уламжлалтай билээ.

Тэгвэл энэ жил энэхүү уламжлалынхаа дагуу “Уулын Баяжуулах Эрдэнэт Үйлдвэр”-ийн харьяа “Орос 19 дүгээр сургууль”-ийн 1-5 дугаар ангийн нийт 370 орчим хүүхдэд хичээлийн хэрэгсэл болон биеийн тамирын хувцсыг бэлэглэж хичээл, сурлагын өндөр амжилт хүсэн Монгол улсдаа ихийг хийж бүтээсэн иргэн хүн болохын ерөөл тавьжээ.

“Монголын зэс” корпорацийн Гүйцэтгэх захирал Ц. Пүрэвтүвшин:

Бид жил бүр Орхон аймгийн ЕБСургуулийн хүүхэд багачуудтай хичээлийн шинэ жилийн баярыг нь хуваалцаж, хичээлийн хэрэгсэл бэлэглэдэг уламжлалыг бий болгоод 4 дахь жилээ угтаад байна.

Энэ жилийн хувьд бид УОК-с тогтоосон дүрэм журамтай холбоотойгоор хүүхэд багачууд уруу чиглэсэн үйл ажиллагааг өмнөх онуудтай харьцуулахад өргөн хүрээнд зохион байгуулж чадсангүй. Тиймээс “Эрдэнэт Үйлдвэрийн харьяа Орос 19 дүгээр сургууль”-ийг сонгон 1-5р ангийн 370 орчим сурагчдад хичээлийн хэрэгслийг нь бэлтгэж өглөө.

Эцэг, эхчүүд гэлтгүй аж ахуй нэгж байгууллагууд, үндэсний үйлдвэрлэгч бүр  санхүүгийн хүндрэлтэй хэцүү цаг үеийг даван туулж байна. Энэ цаг үед бид бага ч болтугай тус дэм болох үүднээс хүүхдүүдийн хичээлийн хэрэгсэл, биеийн тамирын хувцас, хувцасны уут, дархлаажуулалтын витамин зэргийг  “Жигэн-Од” ХХК, “Эксклюзив Монголиа” ХХК болон “Монос групп” ХХК-тай хамтран бэлтгэсэн.

Хүүхдүүдийн бэлгийг богино хугацаанд бэлтгэн нийлүүлж бидний ажилд гүн туслалцаа үзүүлсэн Үндэсний үйлдвэрлэгч компаниуддаа талархсанаа илэрхийлье .

Дашрамд дурдахад “Монголын Зэс” корпорациас Орхон аймгийн сургуулийн насны нийт 4500 гаруй хүүхдэд жил бүр шинэ жилийн баярын бэлэг бүхий мэндчилгээ хүргүүлдэг. 

Мөн 2017 онд Эрдэнэт хотод 300 метр урттай гэрэлт гудамжийг “Монголын Зэс” корпораци өөрийн хөрөнгөөр байгуулж байсан билээ.