Монгол Улсын Гадаад харилцааны яам, АНУ-ын Төрийн департамент хоорондын Консулын зөвлөлдөх уулзалт АНУ-ын Вашингтон хотноо /энэ сарын 28-нд/ боллоо.
Уулзалтад Монгол Улсаас АНУ-д суугаа Элчин сайд Ө.Батбаяр, ЭСЯ-ны дипломат ажилтнууд болон АНУ-д суугаа бусад дипломат төлөөлөгчийн газрын тэргүүн нар, АНУ-ын Төрийн департаментын Туслах төрийн нарийн бичгийн дарга Майкл ДеСомбре болон холбогдох албаны төлөөлөл оролцлоо. Уулзалтын үеэр талууд хоёр орны консулын харилцаа, иргэдийн харилцан зорчих нөхцөл, саатуулагдсан болон ял эдэлж буй иргэдтэй холбоотой асуудал, түүнчлэн АНУ-ын визийн барьцаа хөтөлбөрийн талаар дэлгэрэнгүй санал солилцов.
Монголын тал иргэддээ зорчиж буй улсынхаа хууль, журмыг чандлан сахиж, зорчихыг зөвшөөрсөн хугацаагаа хэтрүүлэхгүй байхыг уриалах зорилгоор хэрэгжүүлж буй “Хариуцлагатай аялъя” аяны талаар танилцуулж, хилийн боомтын шалган нэвтрүүлэх чадавхыг бэхжүүлэх, үндэсний гадаад паспортын аюулгүй байдал, нууцлалыг сайжруулах чиглэлээр авч хэрэгжүүлж буй арга хэмжээний талаар мэдээлэл өгөв. Мөн эдгээр хүчин чармайлт нь Монгол Улсыг АНУ-ын визийн барьцааны хөтөлбөрт хамрагдсан орнуудын жагсаалтаас ойрын хугацаанд гаргахад эерэгээр нөлөөлнө гэдэгт итгэж буйгаа илэрхийлэв.
АНУ-ын тал Монгол Улсад зорчиж буй болон оршин сууж буй АНУ-ын иргэдэд үзүүлж буй дэмжлэг, хамтын ажиллагаанд талархал илэрхийлж, уулзалтын үеэр хөндөгдсөн асуудлаар цаашид идэвхтэй хамтран ажиллахаа нотлов. Талууд энэхүү консулын зөвлөлдөх механизм нь Монгол, Америкийн стратегийн яриа хэлэлцээний чухал бүрэлдэхүүн хэсэг болохыг онцолж, хоёр орны иргэдийн эрх, хууль ёсны ашиг сонирхлыг хамгаалах, харилцан зорчих нөхцөлийг сайжруулах болон консулын хамтын ажиллагааг өргөжүүлэх чиглэлээр зөвлөлдөх уулзалтыг цаашид тогтмол зохион байгуулахын ач холбогдлыг тэмдэглэв гэж ГХЯ-наас мэдээллээ.
