Бүх шатны сургалтын байгууллагын үйл ажиллагааг есдүгээр сарын 01-ний өдрөөс үе шаттай эхлүүлхээр болсон. Мөн хичээлийг танхимын болон теле хичээл, цахим гэсэн хосолсон хэлбэрээр явуулахаар шийдвэрлэсэн билээ.

Энэ дагуу:

• Цэцэрлэг, ерөнхий боловсролын сургуулийн хичээл Ес дүгээр сарын 1-нээс, 

• Мэргэжлийн сургалт, үйлдвэрлэлийн төвийн хичээл Ес дүгээр сарын 14-нөөс, 

• Их, дээд сургууль, коллежийн хичээл Арав дугаар сарын 5-ны өдрөөс эхэлнэ.

ЕБС, цэцэрлэг, Их дээд сургуулиудын нэг ангид 20 хүүхэд байхаар танхимын сургалтыг хийнэ. Энэ талаар БШУЯ-ны Ерөнхий боловсролын бодлогын газрын дарга Т.Ням-Очир: “ЕБС-иуд гурван өдөр танхимаар, хоёр өдөр цахимаар хичээл үзэх тал дээр иргэд эргэлзэж байна. Үүнийг энгийнээр тайлбарлавал өмнө нь 40 сурагчтай 11-р ангийн хүүхдүүд өглөө 08:00 цагаас эхлэн 7 цагийн хичээлээ судлаад 13:30 цагт тардаг байсан.

Одоо шинэ зохицуулалтаар тухайн 40 хүүхэдтэй хоёр дэд бүлэг болж хуваагдана. Эхний бүлэг нь  08:00-10:30, дараагийн бүлэн 11:00-13:30 хүртэл хичээллэнэ гэсэн үг. Ийм л зохицуулалтыг хийх юм. Ялангуяа нийслэлийн сургуулийн ачаалал өндөр ба 70-аас дээш сурагчтай 15 бүлэг, 60-аас дээш сурагчтай 95 бүлэг байна. Эдгээрийг гурван бүлэгт хувааж өдрийн зохицуулалт хийхээс өөр аргагүй болж байгаа юм. Эхний хоёр бүлэг Даваа гаригт хичээллэсэн бол дараагийн бүлэг нь Мягмар гаригт хичээллэх гэх мэт зохицуулалтыг хийн долоон хоногийн гурван өдрийг танхимын, хоёр өдрийг зайны сургалтын арга барилаар шийдвэрлэнэ" гэв.  

Тодруулбал, батлагдсан сургалтын хөтөлбөрийн дагуу жишээ нь математикийн хичээл өмнө нь долоо хоногт 5 цагаар судлагддаг байсан бол одоо 2-3 цаг судлах байдлаар хөтөлбөрт өөрчлөлт оруулсан байна. Мөн боловсролын хүрээлэнгээс энэ хүрээнд арга зүйн зөвлөмжийн хамт хичээлүүдийн гол тулгуур агуулгуудыг боловсруулан гаргажээ. Өөрөөр хэлбэл, хичээлүүдийн аль агуулгыг танхимын сургалтдаа багтааж, алийг нь теле хичээл буюу зайны сургалтын агуулгадаа багтаах арга зүйг боловсруулжээ.