Төрийн захиргааны байгууллагын удирдлагууд мэргэшүүлэх сургалтад хамрагджээ.
Төрийн албаны тухай шинэ хуулийн 23 дугаар зүйлд төрийн захиргааны тэргүүн, эрхэлсэн, ахлах түшмэлийн ангилалд хамаарах албан тушаалтнууд мэргэшүүлэх багц сургалтад хамрагдаж, төгссөн байна гэж заасан байдаг.
Үүний дагуу төрийн албыг бэхжүүлж, албан хаагчдыг чадваржуулах зорилгоор Монгол Улсын Төрийн албаны зөвлөлөөс Удирдлагын академитай хамтран “Төрийн захиргааны Ахлах түшмэлийн мэргэшүүлэх багц сургалт”-ыг сүүлийн гурван сарын хугацаанд цахим хэлбэрээр зохион байгуулжээ.
Тус сургалтад Ховд аймгийн төрийн байгууллагын удирдлага, сумдын ИТХ-ын Нарийн бичгийн дарга, ЗДТГ-ын дарга нараас бүрдсэн 49 албан хаагч хамрагдаж, зургаадугаар сарын 8-нд гэрчилгээ /сертификат/ гардан авсан байна.
Эх сурвалж: МОНЦАМЭ
