Засаг авсан цагаасаа хойш эрүүл ухаанаар хүлээн зөвшөөрөхийн аргагүй элдэв сюрпризийг ээлж дараалан барьж буй дарга нартаа талархаж явдаг шүү, манайхан. Тэдний л ачаар бид элэг хөших хийгээд уур цухал төрөх, хошгоруулах болоод хууран мэхлэхийн гайхамшгийг өдөр бүр амсаж, чухам амьд яваадаа гайхан баясдаг билээ л. Гэсэн хэдий ч тоглоом тоотой нь дээр гэж үг бий.

Өчигдөр Ерөнхий сайд маань “Нийгэм, эдийн засгийн үзүүлэлтээр улсдаа тэргүүлсэн” яам, тамгын газар, шилдэг аймаг, хотуудыг шалгаруулсан байна. Улаанбаатар хот тэргүүн магнайджээ. Хотын дарга маасайтал инээгээд алтан “гулдмай” атгасныг үзвэл зүүд биш бололтой. Өмнөговь, Дархан-Уул, Дорнод, Орхон аймгууд удаалж, Хууль зүйн яам, Хөдөлмөрийн яам, Сангийн яамдууд мөн шилдгээр шалгарчээ. Хүний эрх хамгийн их зөрчигддөг хууль зүйн салбар, хамгийн олон ажилгүйчүүдтэй Хөдөлмөрийн яам шилдэг болсон байх юм. За энэ ч дүүрч. Харин тэр Улаанбаатар...

Ердөө гуравхан сарын өмнө Улаанбаатарын утаа гамшгийн хэмжээнд хүрч, агаарын бохирдлоор дэлхийн хотуудаас гуравдугаарт (Бээжин, Ираны нийслэл Авхазын дараа) жагсаж байлаа. Ялгаатай нь Бээжин, Авхаз хотууд үйлдвэрүүдээсээ болж агаар бохирдсон бол манайх зүгээр л түүхий нүүрсний хэрэглээ, гэр хорооллоосоо болсон хэрэг. Тэгэхээр бид нийгмийн асуудлаас гадна эдийн засгийн хувьд ч “асуудалтай” гэсэн үг. 1980-аад онд Японы Засгийн газраас дайны төлбөрт өгсөн “Говь” компаниас өөр томоохон үйлдвэр Улаанбаатарт байхгүй, ажилчдынх нь тоо 2000 хүрэхгүй.

Улаанбаатарт газар газрын ажилгүйчүүд ажил хайж, малаа барсан малчид амьжиргаа хөөж ирээд буцах зардалгүй гацсанаас хотын хүн амын даац хэтэрч ус, дулаан, зам сүлжээ гээд дэд бүтцийн хувьд ачааллаа даахаа больсон билээ. 21 аймаг, нийслэлийн ажилгүйчүүдээс хамгийн олон ажилгүйчүүд Улаанбаатарт бий. Ядуурал ч мөн дайны. Яахав, гурван сарын өмнөхөө бодвол Улаанбаатар утаагүй л болсон байна.

Гэвч өвөл дахиад ирнэ, утаа дахиад гарна. Утаа байтугай юм болно. Утаа арилсанд Улаанбаатарын Засаг дарга ямар хамаа байна аа. Тэгж их талархмаар байсан юм бол дөрвөн уулын савдаг, салхины эзэнд шагнал гардуулчихгүй. Эсвэл "энэ жил манай төрийн байгууллагуудаас шилдэг хамт олон гарсангүй" гээд шагналаа буцаасан ч болно. 

Салхи хаашаа хийсч байгааг биш, хаанаас ирж байгааг хар гэдэг билүү? Ажаад байхад Улаанбаатарын жинхэнэ утаа гэр хорооллын яндангаас биш, манай дарга нарын тархи толгойноос уугидаг шиг ээ.

Б.ЗАЯА

Холбоотой мэдээ: Улаанбаатар хот шилдгээр шалгарлаа